KEINI INNGHAHNA CHU PATHIAN A NI - Hawla

(MNF hotupa hian CBI hi tham theih an ni a ti)

- Lal Thanhawla, Chief Minister

Mizoram News Service (MNS). Aizawl.4.11.2017 : Ni 3.Nov.2017, Zirtawpni khan Congress Bhavan-ah thusawiin MPCC president leh Mizoram Chief Minister nibawk Pu Lal Thanhawla chuan "BJP-te hian Pathian mitnautê an khawih avangin Central lamah an tla hniam chak hle a, BJP chunga rinna nghattute an talbuai tan nasa hle a ni. Keini chu Central Congress-ah kan innghat lo , kan innghahna chu Pathian a ni. Tun dinhmunah BJP Sorkar hnuaiah hian India economy in mumal a nei theilo a, GDP nasa takin a tlahniam a, chutih laiin Mizoram GSDP thanna erawh India State zingah chuan a sang ber pawl niin 11% bawr vel a ni a. Mi țhenkhat min sawisel duh leh sawi mai tur hrelo te'n 'Development a chàwl' ti ti mahse chu chuan a chàwlh loh zia a lantir chiang em em a ni," a ti.

Chief Minister Pu Lal Thanhawla chuan, Mizoram in hmasawnna ruhrel lian kan neih chungchang sawiin, "PC Sorkar leh MNF Sorkar kan hrawn tawh a, an Sorkar chhungin Mizoram pum pui tan hmasawnna ruhrel lian min hnutchhiah sawitur a awm lova, Tuirial HEP leh Referral Hospital-te pawh kan hria a ni. Tuirial HEP hawn mai theih a ni tawh a, Referral Hospital pawh MNF an Sorkar lai khan ar vulh nante an hmang mai mai a, Kohhran pakhat hnena hralh an tumlai takin an tla ta anih kha, tunah chuan kan hotute'n theihtawp chhuahin hma an la a, a chhawrtu mipui pawh an tam chho hle tawh a ni. Mizo mipuiten kan rualawh-na a nasa a, Congress party chuan Referral hospital ah hian Medical College kan din dawn a ni" a ti bawk.

"Mite tlûkchhiatna ah dinchhuah tum an awm thin, kei ngei pawh dàwta sual tinrênga min hèkin, dan dik pawh ni lovin anmahni uisathiama an ngaih min chhuitir tawh a, mahse kan dik zawk miau vangin kan hneh zel zawk a ni. Mizo Carbon chungchangah inpuh hmingchhiat tumna a lian hle a, mipuiten engkim kan hriatve a ngai a, dik taka chhui a nih theihnan CBI ka ko lut dawn a, chumi atana thil tih ngaite peihfel a ni thawkhat tawh a. Mizoram sorkar phalna lovin CBI a koh luh theih loh tih hi kan hriat a ngai a, mahni lam diklo tan CBI koh luh hi thil tih chi a nilo mai thei a ni. MNF hotupa hian 'CBI te hi tham theih an ni' tiin a lo sawi tawh a, chuvangin engpawh rawn chhuichhuak tase an awih leh chuanglo ang tih a hlauhawm hle a ni." Chief Minister Pu Lal Thanhawla chuan a ti bawk.