Vawiin chawhma khan Mizoram ICFAI University chuan convocation vawi 6-na an hmang a, Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) chuan a hmanpui.Khuallian Lt. Gen. Nirbhay Sharma chuan convocation-a zirlaite chu a lawmpui thu sawiin, an zirtirtute, nu leh pa te thawhrah a nih thu a sawi a. An degree hmuh tharte chuan an thawhrimna a lantirin, an hmalam hun tana rahbi pawimawh tak a nih thu a sawi a. Vawiin hi hlimna ni a nih rualin, eizawnna a keng tel lo tih kan hriat nawn a pawimawh a ti a, kan inthlahdah a thianglo a ni, a ti. Mizoramah lehkhathiam hna hmulo kan pung zela, chuvangin Mizoram leh India ram mai nilo, khawvel ramdang thleng thei tur khawpa kan inpuahchah a ngai a ni, a ti a. Hindi chu kan tawng hmanlaite thlak tur nilovin, hnamdangte nena kan inbiakpawh nan leh sumdawn tawn nan thiam belh a tul a ti bawk.
Chancellor Prof. J.P. Ramappa chuan Mizoram ICFAI University-in kum 10-a kalta chhunga zirtirtute inpekna chu lawmawm a ti a. Zirlaite chu an kal zelna turah duhsakna hlanin, thil a eng lama thlir zel turin a chah a. An thiamna leh theihna te chu tipung zela, an thil tihna apianga mahni inringtawk chungin theihtawp chhuah turin a chah a ni.
ICFAI University Vice Chancellor Lt. Gen. Dr. Anil Kumar Misra AVSM (Retd.) chuan inlawmna thu sawiin, zirlaite chu an zirtirtute thawhrimna leh nu leh pate inpekna hre reng a, khua leh tui tha ni turin a chah a ni. Mizoram ICFAI University aṭanga degree hmu tharte hi an vaiin mi 129 an ni a, MBA-ah mi 20, BBA-ah mi 45, BHTM-ah mi 15, M.A. (Pol. Sc.)-ah mi 26, M.A. (Eng)-ah mi 18 leh BCA-ah mi 5 ten an hmu a ni. -DIPR Mizoram
Post a Comment