Vawiin chawhma khan Lal Thanhawla Auditorium-ah Mizoram Primary Teachers' Association (MPTA) khawmpui neih a ni a. He hun hi Chief Minister Pu Lal Thanhawla'n a hmanpui a ni.
Chief Minister Pu Lal Thanhawla chuan, "Zirlai leh naupang te chu ram leh hnam hmabak, leh ram leh hnam innghahna kan ti a. Zirtirtute pawh ram leh hnam siamtute kan ti a, zirtirtu zingah pawh primary zirtirtute chu zirna intanna hmuna naupang thluak insiam puitling chho mek, zirlaite an thiam tur thiam tir tute an ni a. Chuvangin Primary School zirtirtute chu ram leh hnam siamna leh ram hmasawnna innghahna bulthum remtute in ni a, in pawimawhna hi nangmahni in hriat dan aiin a sang zawk a ni", a ti. Chutianga dinhmun pawimawh luahtute chuan naupang tan nundan, hriselna kawngah, faina, incheidan, zuk leh hmuam leh kawngtin rengah entawn tlak leh entawn turin mawhphurhna lian tak an nei tih an hre reng tur a ni a ti. Zirtirtute chu saptawng leh Vaitawng pawimawhna hrechiang tur leh chumi pawimawhna hre chunga zirlaite zirtira tawng hrang hrang an thiam nal theihna tura kaihruai leh fuih turin a chak bawk a ni.
Mizo khawtlang nun siamthatna thlengin zirtirtute tangkaina leh mamawhna a nasa tih a sawi a. A bikin Primary school lut rual, zirlai naupang te rilruah hawihhawmna, nu leh pa thuawih leh aia upa zah thiam hlutna leh hlawhtlinna bul a nih zia nitin an rilrua tuh a pawimawh takzet in a sawi a. Hriselna kawng kawhhmuh, zuk leh hmuam thatlohna zirtir pawh zirna bakah zirtirtuten an tih chuan naupangte chu puitling an lo nih hnuaah pawh thil thalo lakah chhia leh tha hriatna an hmang thei dawn a ni a ti. Ram hmasawnna tura sawrkar hmalakna zawng zawngte pawh atawpah chuan zirnaah tha ah tho a innghat tih a sawi a, zirna tha nei turin zirtirtu tha leh hna a inpe an pawimawh a.Chuvangin zirna sawrkarin a dah pawimawh takzet a ni a ti a Mizoram in zirna a ngaihpawimawh zia chu state anga Education Reform Commission dintu tlemte zinga mi leh a Commission rawtna a theih ang anga kal puitu a nihna hian a ti chiang a ni a ti.
MPTA khawmpui hi an pawl President Pu C.Biaknghinglova'n a kaihruai a. He hunah hian primary school kaihhnawih thilah report ngaihthlak a ni a. Report a tarlan dan chuan MPTA hi kum 1946ah khan din a ni a. Tun dinhmunah Mizoramah Sawrkar Primary School 816, zirtirtu post hnawhkhah loh post 882, zirlai 40,550 leh chawhrualin sikul pakhat zelah zirtirtu 3.7 zel an awm a ni. Zirtirtu thawk nghet mi 2348, contract a chhawr mi 104, Non-formal Teacher 9, Aided Teacher 29 leh SSA teacher 589 awm mekin Primary School a thawk mek chu zitirtu 3079 an awm mek a, primary zirtirtu sanctioned post chu 3362 a ni . Kum 2020 hmaa zirtirtu pension tur zat chu 211 a chhut a ni. Hun engemaw ti chen Government Primary School teacher post ruak thin post 188 chu nikum September thla khan hnawhkhah tura tih fel niin Headmaster a kaisang zinga 60% in an hna an zawm tawh a ni. -DIPR Mizoram
Post a Comment