-K.C. Lalthansanga
FIFA Under-17 World Cup-ah vanneihthlak takin India aiawhin Aizawl Vaivakawn tleirawl, Lalengmawia (Apuia) chu a tel ve hlauh va, khawvelin a inkhel pawh kan hmuh kha. India team an tlak hnuah a pianna ramah a rawn hawng a, October ni 14, 2017 khan Vaivakawn khawtlangin an lo hmuak a nih kha.
Mizoram sawrkar hian infiammi hlawhtlingte chu lawmman a lo pe tawh thin. Nikum, Rio Olympic 2016-a India hmeichhe hockey team-a tel Lalruatfeli kha August ni 26, 2016 khan Sports Minister Pu Zodintluanga hovin CYMA Auditorium-ah ropui takin an hmuak a. Mizoram State Sports Council (MSSC)-in cheng nuai 3 an pek leh, Mizoram State Olympic Association-in cheng nuai 2 an pek chu Sport Minister hian a hlan nghe nghe.
Hemi hma daih tawh, October ni 20, 2012 khan Manipur boxer Mary Kom chu Olympic-a Bronze Medal a lak avangin Aijal Club-ah chawimawina hun neih a ni a, kan Chief Minister pawhin telpuiin cheng nuai 6 cheque a hlan a, a tukah a bangla-ah breakfast a buatsaihsak bawk.
Kan tawng tu'n an huat thu suhah, Ruatfeli kha squad-a tel a ni a, a inkhel ve ta lo. Mary Kom pawh hi a pianna ram lama Mizo a nihna phattu a ni a, state dang mi a ni bawk. Chung mite hnenah sawrkarin chawimawina buatsaiha lawmpui thilpek chuti zat a pek phal si chuan, engah nge FIFA World Cup U-17-a Mizo khel ngei mai hnenah pawisa pek leh chawimawi chu sawi loh, a hmuahna takngial pawh an siam loh?!
Manipur sawrkar chuan India squad tur an puana Manipur player 8 ngawt an tel khan, Youth Affairs & Sports Minister Letpao Haokip chuan heng player 8-te hi cheng nuai 5 theuh an pek tur thu September ni 28, 2017 khan a lo sawi lawk daih tawh a. Winner an nih phei chuan incentive tha tawk (super special incentive) an pek tur thu a sawi bawk. An sawi ang ngeiin Chief Minister Nongthombam Biren chuan heng mite hi cheng nuai 5 cheque a hlan tawh a ni.
Hei mai a ni hleinem, heng player pariat nu leh pate hi rethei tak tak an nih hlawm avangin, Sports Minister chuan an fate inkhel an en theih nan thlawhna ticket leh Rs. 10000 theuh a la pe zui nia maw le!
Heng thil zawng zawngte hi ngaihtuah chuan engati nge keini hi, tih awl tak a ni. Ni danga a changtupa ang maia phur em em kha ngati nge tun tum hi a reh tak hmak?! Ngati nge MFA emaw, ADFA emaw, MSSC emaw pawhin a hmuahna leh chawimawi takngial pawh an siam loh?! Ngaihtuahna a kal thui vawng vawng.
Kan Chief Minister zahawm takin, "Kan party mi lo chu ka thisen zawmpui pawh ni se eng atan mah ka ti lo" a lo tih tawh kha ka hre chhuak a. Apuia pa hi MPC Thalai Headquarters-ah Treasurer a ni mek a, a awmna vengah MPC Local Council member a ni bawk a. Kan hotupa ber thusawi ngaihtuah chuan, party dang mi leh sa an nih avangin sawrkar hi a ngawi ta hmuk em ni tih zawhna a piantir a. A nih erawh ka ring phal si lo.
Post a Comment