Ningani zan khan Indian Super League-ah Chennaiyin FC chuan 3-0 in Northeast United an sawp a, Chennai club tana inkhel bul ṭantu Jerry Lalrinzuala chu Emerging Player of the match-ah thlan a ni.
Chennaiyin-in match hnih an khelh tawhah a vawi khat nan hnehna an chang ve ta a, NorthEast United erawhin match hnih an khelh tawhah chak hmel an la hmu lo - an match hmasa berah an mikhual Jamshedpur FC chu goal khung loin an lo inhnehtawkpui tawh a ni.
Mizo telna
Chennaiyin FC coach John Gregory-a'n NorthEast United hmachhawn turin 4-2-3-1 formation hman a thlang a, match hmasa ang bawkin Jeje Lalpekhlua leh Jerry Lalrinzuala ten inkhel bul an ṭan a, Aston Villa boss hlui hnuaiah Jeje chu tlarhmaah maltlat tir a ni.
NorthEast United FC coach Joao de Deus-a'n Robert Lalthlamuana a rinna a takin a ti lang nawn a, Khawzawl tlangval hian match hmasa ber ang bawkin captain armband a hreng. Lalrindika Ralte pawhin inkhel bul a ṭan a, Lalrempuia Fanai tan erawh hmun a la awm rih lo.
Inkhel chu
Chennaiyin-in an match hmasa berah an mualah FC Goa an ngam loh avangin tlawm nawn an duh lo a, an goal hmasa ber hmu tur pawhin an nghah rei a ngai lo. Highlanders tan Seminlen Doungel-a'n uiawm taka a hlah hnuah Super Machans zawkin goal an khung a, Abdul Hakku chuan minute 11-na lekah an lamah a ti lut.
Mizo tlangval Jeje leh Raphael Augusto an hlauhawm zui a, match hmasa bera Jeje penalty hlawhchhuah hmanga goal khungtu Augusto hian minute 24-naah an goal hnihna a khung chhunzawm. NorthEast United-in Halicharan Narzary hmangin hun ṭha nei ve mah se goal erawh an khung thei lo a, minute 84-naa Mohammed Rafi-a'n goal a khung leh meuh chuan Highlanders tan thawh a beiseiawm tawh lo.
Inkhel Tur
Zanin Indian Super League-ah match khat a awm dawn a, zan dar 8:00-ah hian Mumbai City chuan FC Goa an mikhual dawn. Mizo tlangval Lalchhawnkima khelhna Mumbai hian an match hmasa berah Bengaluru FC chu 2-0 in an ngam lo tawh a, Mizo tel lohna Goa hian khualmualah 3-2 in Chennaiyin an hneh tawh thung.
Pathianni tlai dar 5:30-ah inkhel a awm dawn bawk a, Kerala Blasters nen goal khung loa inhnehtawk Atletico de Kolkata chuan Lalchhuanmawia Fanai leh Isaac Vanmalsawma te khelhna Pune City an mikhual ang. Pathianni zan dar 8:00-ah Bengaluru FC chuan Delhi Dynamos an mikhual bawk ang.
-Vanglaini
Post a Comment