Vanglaini chanchinbu VOL. XXXII NO. 257 NOV. 8, 2017 phek 8, Thlirna(Zalen Huang)-a Pu P. L. Liandinga thupui kha a mawi ka va' n ti tehlul em! A ni lah taka ZIRTIRTU hi kan mamawh tlang hle niin a lang. Khawi kipa mite pawh hian kan zawl tawk zelah kan hriatloh min hrilfiaha min zirtitu tur kan mamawh theuh a nih hmel. A chhan chu kan hring nun damchhung chuan inzir ngai reng renga khawsa kan ni tlat!
He thuziaktu Pu P. L. LIANDINGA ngei pawh hian a hna atanga a pension hial tawh hnu pawh hian ZIRTIRTU a la mamawh ve hle tho niin a lang. A chhan chu Directorate of School Education inrelbawl dan fumfe tak hre chiang tawk lova thil ni ve awm tak tak dik ziktluak mang si lo, School Education Department pumpui, a bikin Director & staff te, Minister-te leh Zirtirtu vekte timualpho thei thil leh chhuanchhe thei ang ber zawnga a rawn ngawpui Hauhuk hualreu ve chiam chiam mai kha chu mi vengva leh thlir zau tan chuan a zia lo lam deuh chu niin a lang.
ENGVANGIN?
A thil sawi thenkhat; belhchian dawllote tarlang ila, ngun takin lo chhut teh:
1. 'Zirtirtu neih loh hi' Mizoramah chuan Sorkar Sikul 'fashion' lar tak a nih laiin khawpui lamah chuan 'inekbeng' hi fashion a lo ni veleh a.
SAWIFIAHNA: 'Zirtirtu neih loh' hi' School Education Delpartment hian Mizorama incheina atan a hman awm kan hre ngai em? Zirtirtu indaih loh luattuk avangin Sikul tinah mamawh zat a dah thei lo mai chauh zawk a ni tih chiang takin a lang.
Zirtirtute Khawpuia 'inekbeng' fashion atana hmang anga a sawi pawh hi tawngkam uchuak a ni a, hmuh theih chinah 'inekbeng' khawpa Zirtirtu tawmkhawm hmuh tur an vang hle, hetianga inekbeng khawpa zirtirtu tawmkhawm hria chuan intihmingchhe thei zawnga ziak chiam lo hian Education Department hotute hnenah ziakin thurawn pe se a fuh zawk ngei ang.
2. "Hmun thenkhatah chuan Sikul chu Zirtirtu hlirin an khat nuai nuai a ni ber a."
SAWIFIAHNA: Hei pawh hi tawngkam uchuak leh SE Department tihmualpho tum hrim hrimna niin a ngaih theih. Hmun thenkhata sikulte ZIRTIRTU hlira khat nuai nuai khawp ni se'ng zirtirtu indaih loh a awm thei dawn em ni? A hma lawkin ZIRTIRTU neih loh fashion atana hmang meka tarlang si, Sikul chu zirtirtu hlira khat nuai nuai tihleh lawi hi thusatellu mai niin a lang. ZIRTIRTU hlira khat nuai nuai Sikul a sawite hi khawi sikulte hi nge ni ang le? Hriat chian a chakawm hle mai?
3. "Zirtirtu hi Kumtin lak awm tak a ni."
SAWIFIAHNA: Department tinah hian hnaruak a awm nual a; mahse, Sorkar sum harsatna avangin lak zung zung theih a nih lohzia chu kan hrechiang vek niin a lang. Tunah erawh zirtirtu lak thawm a awm fo ta zawk a nih hi! Sum awm se'ng chuan SE Department hian Sikul tina awm tur zat zirtirtu RTE-in a phut ang thlap a la ngei ang. Sum a awm loh vang zawkin Kumtin zirtirtu lak chu thil theih loh hul hual niin a lang.
4. ACR leh lehkha bo; GPF leh MR Bill: Midday Meal; aikal lak leh Training chungchang etc. a sawilante phei hi chu thil hlui tawh tak a ŕawn phawrh thar a nih hmel? Tunah chuan Directorate of School Education inrelbawl dan hi State dangte aiin a felfai zawk daih tih a taka hmutu ni vein ka inhria. An invawn dan a felfai a, Confidencial cell te, Media cell te, Pay anomaly cell etc. te awmin, attendance Register aiah Biometric attendance hmang turin an inbun fel mek a; hna a ran zawk nan file processing system pawh internet Online hmanga tih zung zung theih tura bun fel ni tawhin hman theih tep a nih thu dawn a ni.
Tin, hei bakah hian an thawk rim em em a, Pisa kai tlai leh haw hma tur viltu turin supervisor an inruat vek a, kartin vawi 2 zinglam leh tlai lamah an check ziah thin niin ka lo hria. Zirlaite leh mipuite tan Education hmalakna pholan a nih theih nan DDK Aizawl nen thawhdunna thuthlung ziakin program chhenfakawm tak tak Kartin ningani tlai apiangin en tur a awm a nih hi!
Tunah phei chuan zirtirtu leh hnathawktu dangte an pension rual ruala pension la nghal thlap theiin an buaipui tawh thin lehnghal niin ka lo hria.
Directorate atangin thawktu mithiam bik intirin subordinate office tinah service book enkawl dan leh account vawn dan an inzirtir mek bawk tih thawktute tawngkam ngei dawn a la ni zui bawk.
Tin, thawktute tan District khawpui tinah Educational Complex din turin hma lak mek a ni a, a thenah phei chuan hawn a ni tawh tih kan hre tlang awm e.
Engpawhnise, phunchiar awm lo tawp tur khawpa inrelbawl tha leh famkim hi zawng eng Department mah hi he khawvela kan cham chhung hian khawiah mah hmuh tur a awm dawn lo tih hriat chian tlan a tha hle.
School Education Directorate pawh hian famkimlohna tam tak chu a nei tih a chiang. Mahse, heti teherha Director leh Staff-te leh zurtirtu zahawm tak takte timualpho thei ang ber zawng leh thu leila tak tak hmanga kap vak lo hian Pu P. L. LIANDINGA hian zirchiang hmasa te tein ziak se'ng chuan a lo dawngsawngtute tan pawh dawnsawn a nuam zawk ngei ang. Writer puitling leh thuthiam tak ni mah se 'ZIRTIRTU ' chu a lo la mamawh ve takzet nia a lan avangin thurawn ka' n pe ve khanglang a ni e.
Post a Comment