Dt.11-11-2017, 12:00 (Noon) @ Aizawl Press Club


CONGRESS LEH MNF HUN A TAWP DAWN EM NI?


Pu Hriata Chhangte in tunlai social media hrang hranga a thu post atanga Mizoram mipuiin kan hriat thar, Mizoram Chief Minister, Pu Lal Thanhawla’n Kolkata Salt Lake-ah building sak mek a lo nei reng a. He building sak mekna hi West Bengal sorkar Land Records-a a lan dan chuan Plot No. AI-178, 3228 Sq. feet a zau niin a neitu pawh Shri Lal Thanhawla s/o Late H.P. Sailo, Zarkawt, Aizawl, tih leh ni 30 August, 2013 khan register a ni tih Pu Hriata Chhangte hian chhui chhuakin a building sak mek thlalak nen social media-ah a tarlang a.
He ram neih dan leh building sakna pawisa a neihdan hi ZNP Thalai chuan buaipui loin kum 2013 MLA Election dawna Pu Lal Thanhawla'n Serchhip bial candidate ni tura Election Commission of India (ECI) hmaa chhechham meuha affidavit a thehluhah he Kolkata-a a ram/inhmun hi a lo ziak tel lo tlat tih hriatchhuah a ni hi mak kan ti hle a ni.
Hetianga mahni thil neih (assets) thehluh kim loh emaw dik lova ziah, 'False Affidavit' hi The Representation of The People Act, 1951 Section 125 A in a sawi ang chuan kan Chief Minister Pu Lal Thanhawla hian mipui leh sorkar a bum avangin leh ECI chuan MLA a nihna atanga ban tir (disqualified) leh MLA chuh nawn theilo tur thlenga hrem/action lak theih a ni.
Mizoram Chief Minister nau, Pu Lal Thanzara, Minister pawh Pu Matana Pachuau (Australia) hmalakna avangin ECI-in MLA a nihna atanga an ban tir (disqualified) hlauhthawnna avangin MLA a nihna atangin a lo ban khalh tawh a. He Pu Lal Thanhawla'n Kolkata-a a inhmun August ni 30, 2013-a register si, 2013 November thlaa nomination afile naa alo ziak tel lo pawh hi Pu Hriata Chhangte hian India Citizen anihna leh Serchhip khua leh tui, New Serchhip a vote nei a nihna angin Election Commission of India hnenah report ngei a tum thu hriat a ni. Chuvangin, Pu Lal Thanhawla hi ECI-in bang tura a tih hma ngeia MLA a nihna atanga bang thuai turin ZNP Thalai chuan kan phut tlat a ni.
Kan ram politics han belhchian hian ‘kum 10 danah sorkar a inthlak thin' tih ringawta innghat MNF party lah chuan Congress sorkar thiltih tha an tih miah loh pawisa sem hi sorkar ve theihna a nih beiseiin a aia thalo zawk SEDP hmanga cheng nuai 3 sem mipuia tawktarhin sorkar an lo tum ve mek a. Hetih lai hian an hotu thenkhat chuan pawisa an sem dawn loh thu an sawi thung.
MNF party hian an sorkar lai khan Bawngkawna kawngpui zauhna tur atan PMGSY hmanga an lei, inhmun chu an party-in an neih leh tak daih thu tualchhung chanchinbu thenkhatah a lo lang a. MNF sorkar lai khan Aizawl khawpuia motor tam lutuk, kawngpui a zim si avanga traffic tawt tih ziaawmna tur niawm takin ZIDCO atangin parking loan tam tham tak mi 3 hnenah Rs. 2,77,00,000/- (Cheng Vaibelchhe hnih leh nuaih sawmsarih leh pasarih) an pe chhuak a, policy mumal awm lo ta chu, he Parking Loan latu zinga pakhat chuan Parking a siamlo mai pawh ni lovin Parking siam tura a insawina inhmun pawh a hralh daih a, Parking loan latu dang pakhat pawhin a siam lova, khawiahnge a pawisa a hman zawh pawh hriat a ni lo.
Hetiang hi tun dinhmuna sorkarna chang tawh te'n an sorkar laia an thil tih a ni. Anni hi kum 10 an sorkar chhunga Mizo Nationalism ngawihbo pui hmiah tu, opposition-a an awm lai chauha Mizo Nationalism sawi thintu an ni bawk. Tunah hian MNF hotu lawk 4 (pali) te hian kum 2018 election-a an dinna tur an la hre mumal lo vek a, chuti chung chuan 'Kum 10 danah sorkarna inthlak thin' tih thu puarpawleng chu innghah nana hmangin an party mipuite an hrai rui mek a, 2018 election-ah sorkarna chang tur angin an insawi reng a ni.
Hetih lai hian an hotu lawk tak tak te'n thubuai rit tak tak an awrh mek a, chubakah dawt hmangin kawng awmsa engemaw zat chu PMGSY sum hmanga a thara laih angin Central sorkarah an report pein pawisa an eizo vek a ni. Supreme Court in tun hnaia Govt of India hnena Fast Track Court-ah MP leh MLA thu buai neite thubuai chinfelna din turin a ti tawh nghe nghe a, he thil hi chinfel a nih chuan MNF hruaitu lute chung hi a rip viau dawn ni pawhin a lang.
Thil kal vel dan en hian Mizo hnama min dintu Pathian hian hmangaihna tel hauh lo leh dimdawina nei hauh lova Mizoram lo suasam thintu party te hi senghawia Mizoram hmangaihtu dik tak, Zoram Peoples Movement (ZPM) kuta rorelna dah hi a tum niin ZNP Thalai chuan kan ring tlat a. An tha tichaka tawngtaina nena huai taka rawn pen chhuak turin ZNP Thalai chuan Zoram mipuite a sawmin a ngen tak meuh che u a ni.
____________________________________________________________________
*Issued by : ZNP Thalai Headquarters, Aizawl, Mizoram.*

Post a Comment

Powered by Blogger.