MNF senior vice president Tawnluia chuan, MNF an sorkar chuan kawngpui an siam ṭhat tur thu leh Mizorama zu leh ruihhlo hluar chu an tihreh tur thu a sawi.

Damparengpui community hall-ah November 7, 2017-a Mamit West MNF Block Conference vawi thumnaah Tawnluia chuan thu sawiin, Mizoramah Congress an sorkar chhungin zu leh drug a hluar a, buhfai a chhiat bakah gas a harsa niin a sawi a, "Kawngpuite hmun tinah a chhe em em vek a. Kawng hrang hrangin unau pahnih rorelna hnuaiah kan ramin harsatna lian pui pui a tâwk mek a, an party chhungkhurah pawh unau pahnih rorelna ṭha ti lo an pung zel a ni," a ti. 

Tawnluia chuan, "MNF kan sorkar chuan kan rama inkalpawhna kawngpui chhe lutuk hi kan siam-

ṭha leh vek dawn a, zu leh drugs hluar ta lutuk pawh tihreh kan tum dawn a ni," a ti a; tui leh kawlphetha hnianghnar zawk leh zirna ṭha leh changtlung zawk an kalpui dawn niin a sawi.

MNF Sr. Vice President chuan, Mizoram Bru zingah Tripura refu­gee camp-a la awm eng emaw zat an awm tih sawiin, refugee camp-a awm Mizoram khua leh tui dik takte chu Mizorama kîr leh vek turin MNF party-in an sáwm tih a sawi a, "Mizoramah lo haw a, lungmuang leh zalen taka chengho turin Bru unaute kan sáwm a ni," a ti. -Vanglaini

Post a Comment

Powered by Blogger.