Mizorama village council (V/C)-te lawmman atan Mizoram sorkarin kum khatah Rs. 2,69,28,000 a sêng ṭhin a, hei hi kum 2014-a dân a siam thar anga pek a ni. Hetih lai hian, Local Administration Department (LAD) hotute chuan, khawtlang hnatlang phatna atan Rs. 25 aia tam phût theih a ni lo a, chu chu V/C ṭhenkhatin an bawhchhiat ṭhin thu an sawi. 

LAD hotute sawi danin, Kum 2014-a V/C dan siamṭhat a nih hnuah Mizoram sorkarin V/C lawmman a tisang a; tun dinhmunah V/C president-in thla khatah Rs. 1,000 an la a, V/C vice president-in Rs. 800, secretary-in Rs. 600, member-in Rs. 600 leh tlangauin Rs. 450 an dawng ṭhin.

V/C-te hlawh atan hian sorkarin thla khatah Rs. 22,44,000 a sêng a, kum khatah Rs. 2,69,28,000 a sêng ṭhin. Mizoramah V/C 536 a awm mek a ni.

VCP-te lawmman chu thla khatah Rs. 5,36,000 a ni a, vice president-te lawmman atan Rs. 4,28,800, secretary-te lawmman atan Rs. 3,21,600, member-te lawmman atan Rs. 7,16,400 leh tlangaute lawmman atan Rs. 2,41,200 sen ṭhin. 

LAD hotute chuan, tun dinhmunah sorkarin V/C lawmman tihpun tumna a neih loh thu an sawi a; India hmarchhak state ṭhenkhatah phei chuan V/C-te lawmman chu sorkarin a pek an hriat loh thu te, Tripura-ah chuan sitting allowance Rs. 50 bâk an lak loh thu te, Assam sorkar pawhin an pek an hre lo a, revenue an lak khawm aṭangin lawmman an insiam mai thu an sawi. Sikkim sorkarah erawh chuan Rs. 5,000 an la niin an sawi bawk.

Mizoram sorkarin September 30, 2011-ah State Finance Commission (SFC) a din a, SFC hian kumin kum tìr lam aṭang khan a vawi khatna atan V/C-te hnenah an khuaa mihring awm zat azirin sum a pe ṭan. 

SFC hian V/C pakhat chhunga mi 500 aia tlem awmnaah Rs. 30,000, mi 501-1,000 inkar awmnaah Rs. 49,000 leh mi 1,000 aia tam awmnaah Rs. 87,000 an pe a; autonomous district council pathum huam chhung tel loin, Mizoramah V/C 536 a awm.

SFC aṭanga LAD-in sum an dawn, V/C-te hnena an pek chhuah chu V/C hrang hrangte'n an hmang ṭha thawkhata an hriat thu sawiin LAD hotute chuan, "A hmain Central Finance Commission aṭangin grant a lo kal ṭhin a, V/C zingah hmang ṭha tawk lo an tam a, SFC hi chu khaw tana rohlu siamna tur a nih angin an hmang ṭha turah kan ngai," an ti. LAD chu V/C-te hnathawh enfiaha vil tura tih ni mah se, V/C zawng zawng hna thawh dan an vil vek sen loh thu an sawi.

LAD hotute chuan, V/C zingah hnatlang phatna leh khawlaia ran chhuak man kawng­ah dâna inziak ang loa kal a, anmahni duhthua kal mai ṭhin an awm tih an sawi a; V/C hnatlang phatna chu Rs. 25 aia tam lo a nih thu leh hnatlang lote rûnna pawh Rs. 50 aia tam lo a nih thu sawiin, "Heng dân bak hi chu dân dang a awm lo," an ti.

Ran khuahkhirh chungchangah, V/C ṭhenkhatin dân bawhchhiaa thil an tih ṭhin thu sawiin, ran chhuak khultirna atan Rs. 500 chawitir ṭhin an awm chu a dik lo tih an sawi a, "Ran chhuak an man hian, ran chaw an lo pekna man leh an lo enkawlna man zawk a ni a, ran chhuak man vang hrim hrimin hrem theih tihna a ni lo," an ti. The Mizoram Gazette, 6.10.2016 no. (6)-ah ran mante chaw pekna man tur (feeding charges for seized animals) a chuang. 

The Mizoram Animal (Control and Taxation) Rules 2016 Section 8(2)-in a tarlan danin, mi ran chhuak mante châwmna man chu V/C fund-ah a lut tur a ni a; vawk, kêl, láwi, sakawr leh ran dangte chu a puitling chinah Rs. 100 leh a tê chinah Rs. 50 a neitute chawitir theih a ni. - Vanglaini

Post a Comment

Powered by Blogger.