Ṭangrual pawl, Zoram Peoples' Movement (ZPM) chuan November 4, Inrinni khan Serchhip Bazarah Serchhip khawpuia veng hrang hranga local body dinna tura beihpui thlakna, Operation November khuhhawnna hun an hmang a; Aizawla ZPM hmunpuia hruaitute'n an hmanpui. Serchhip district-a Assembly bial pathumah candidate neih an tum thu an tarlang.
Serchhipa Operation November hi Serchhipa ZPM chairman V Rozamliana’n kaihruaiin, Rev. JH Zahluna’n hunserh a hmang a; campaign khuh hawngtu ZPM Serchhip General Secretary K Sapdanga chuan, kum 2018-a Assembly inthlanpuiah ZPM-in Serchhip district-a bial pathum - Serchhip,Tuikum leh Hrangturzo bialahte ZPM-in hnehna chang ngei tura hmalak an tum thu a sawi a ni.
Thu sawitu PL Liandinga chuan, Mizoram hmun hrang hranga kawngpui chhiate chu a siamna tura sum hmuh tawh tam tak hmangin tun aia ṭha zawka siam theih a nih thu a sawi a, "Heti em ema Mizoram kawng chhiat chhan hi kumin fûr ruahtui tam vang a ni lo a, hun rei tak kan kawngte'n ngaihsak an hlawh loh vang zawk a ni," a ti.
PL Liandinga chuan, sorkar ding tawhte'n Mizoram education system an sawpchhe nasa nia sawiin, "Zirtirtute kan tithangtláwm em em a, kan zirtirtute zingah mahni inngaisang tak pawh an váng em em tawh a ni,” a ti.
Zoram siamṭhat duhtute zawng zawng chu ZPM thláwp tura ngenin, ZPM chu mi beidawng kalkhawm an ni lo a, mi mangang, Zoram tluchhe mek tun din duhtute awmkhawmna a nih thu a sawi.
ZPM general headquarters-a Steering Committee chairman Lalliansawta chuan, ZPM chu an ṭanrual thu a sawi a; ZPM hruaitute zinga mi B Lalchhanzova chuan, Mizorama politics khelh dan dik lo vangin mipuite chu an duh ang pawh sawi ngam loin, hlauhna bâwihah an táng mek nia sawiin, "Sorkar hnathawkte phei chu an ṭi dêk a ni. Kum 2018-ah kalphung thar, mipui sorkar din turin i ṭangrual u,” a ti.
MPC president Lalhmangaiha Sailo pawhin thu sawiin, “ZPM a sorkar chuan Mizoram budget pawtpénga flagship programme hming vuaha mahni party mi leh sa vulh a bo ang a, budget pumpui hi mipui hmasawnna atan rualkhai taka hman a ni tawh ang," a ti a; chu hun chu nghakhlel takin mipuiin an thlir mek thu a sawi.
ZNP general secretary RD Lalrammawia chuan, tuna nawmsak duh luat vangin ram hruaitute'n ram an tichhe mek niin a sawi a, "Inthlan dawna sum leh therhlo chhe tê tê hmanga kan inleitir ṭhinte hi vawiina kan nawmsak duh luat vang a ni a, hei hian sorkar ṭha lo a hring a, kan pi leh pute'n lu chhum bán chhum huama an lo humhalh ram hi a tlusawp mek a ni," a ti. - Vanglaini
Post a Comment