-Hriata Shooterz

Kan hma lawk ah hian vengtin a Kohhran hrang hrangte chuan Krismass leh kumthar ruai kan țheh leh mup mup dawn niin a lang. Kan inbuatsaih țan mek zel a, kan kût sa tur ngaihtuahtu tur pawh kan in ruat fel vek tawh maithei. Țhenkhatin ran lu kim, țhenkhat in kimlo deuh te, țhenkhat chuan Vawk leh Ar a tlai zo pawh kan ni mahna.

Engapawh chu nise, kan lokal tawh dan ah siam rem ngai kan nei nual maithei. Țhenkhat in kan hman mek pawh a lo ni maithei bawk. Heti hian ngaihtuahna ka nei a.

1. Kan kohhran member Ran ngei : Ran ngaihtuahtu tur kan ruatte hian mahni veng chhung pelin veng dangah tlawm leh lian țha, man man deuh kan ngaihtuah țhin em? Kan budget tlin tawk aia man zawk kan zawng țhin em? Sum renchem thei ang ber leh daihzai thei tur kan duh tlangpui țhin. Chutih rual chuan veng pawn lam ai chuan, 'Kan Kohhran member ah kan ran duh ang nei an awm em?' tih hi ngaihtuah hmasa ila, kan ran leisakte khan an ran man dawn ațangin 'Sawm a pakhat' an pe ngei tur ah ngai ila, chu chu 'Kan Kohhran' sum bawm ah alo lut ngei bawk a nga, veng dang/kohhran dang a sum lut ai chuan kan Kohhran in thilpek rawngbawlna ah hma kan sawn phah ngei ang(Kan member in kan neilo a nih chauhin pawn lam ah chuan zawng ta ila)
2. Ran lian uchuak kan mamawh em? : Țhenkhat chuan Vawk kan ngaihtuah hian lian leh thau tak kan zawng țhin. Mahse, han ei chiah hian a thau ai chuan a ti chu duh kan tam zawk mah si. Vawk thau tak, 50" chuang mah a lian, thau bawk si kan hmuh fuh chuan kan lawm țhin. Mahse, kan ei ngam leh si lo. 
Hei ai chuan kan ei ngam tawk lek a thau, lian vaklo, 40" hnuai lam deuh pawh ni se, pahnih lei mai zawk ta ila, kan ei tawk tur bak chu hralh chhuah leh mai te hi ching zawk ta ila a țha zawk angem? Hnianghnar leh tui tak in ruai kan țheh theih phah hlauh maithei a sin.

3. Upa Sa : Upa sa han tih lem ah hian tunlai țhalai leh naupang chen in kan ei loh chuan sa ei ah pawh in ngailo kan tam ta mai. Chu chu 'A kawchhung leh a misa' hi a ni. Vawk thau tak, a thau ei ngamlo tan phei chuan ei tur awm vaklo pakhat lei ai chuan, thau lutuk lem lo pahnih kan lei chuan 'a kawchhung leh a misa' pawh alo tam zawk ngei a nga, 'tlem tlem a sem rual leh fatu țhenkhatin an țhian țha leh laina hnaite an duhsak bik țhin chu hnianghnar deuhin kan ei tlang thei ngei ang.'
Kohhran member tin hian kan tlin tawk aia tam mah thawhlawm hi kan thawh vek țhin a, mahni chhungkua a vawi 2/3 kan ei theih tur ang hi vawikhat ei turin kan thawh tlangpui maithei. Ruai kan țheh a, ei tur hmu mumal lova tlingtla ve mai pawh kan awm țhin. Chuvangin kan thawhlawm mil ni chiahlo mahse, 'tun aia hnianghnar leh tlai deuh zawk a ruai kan țheh țheuh theih nan' hemi ka sawi tlemte pawh hi hmang țangkai ta ila 'Kohhran tin te hi kan hlim zual deuh mahna.

Post a Comment

Powered by Blogger.