Aizawl 20th November, 2017: Vawin khan PRISM chuan kan manifesto 9A a kan lo ziah tawh Land Reform chungchanga hmalakna hmasa tur chungchang kan sawiho a. He huna thusawitu Pu Vanlalruata President PRISM chuan, “PRISM Party in kum 2018-a sorkarna kan chan chuan Land Reform kan kalpui ngei ngei dawn a ni,” a ti.
Pu Ruata chuan, “Kan Mizo Lal ten ram an lo pek te, district council in ram an pek leh village council ten ram an lo pek tawh zawng zawng kan pawm vek dawn a. Compensation lak nan a hman theih vek dawn a ni. Ram inbawhthuah a awm chuan pass nei hmasain an chang ang a, khaw ramri (village boundary) buai zawng zawng pawh chinfel vek kan tum ang,” a ti.
“Mizoramah hian ram zau pui pui, tha tak tak, hman tangkai si loh tam tak a awm a. Heng kan ram tha te hi ei leh bara intodelh tur chuan hman tangkai a ngai a, awmze nei taka sorkar hian hma a lak a hun tawh a. Kum 2018-a PRISM Party in sorkarna kan siam hunah chuan, heng kan ram tha neih hman tangkai siloh hmang tangkai tur hian hma kan la nghal dawn a ni,” a ti bawk.
PRISM chuan Kristianna hi a tha bik a ni tih lantir a, kan Pathian chawimawi tur te; kan chhehvel hnam te aia ropui zawk kan nih lantir tur te; Zohnahthlak te inpumkhatna atana kan unau te hipkhawm tur tein, Mizoram hi ram ralmuang, dik leh fel taka ro inrel, hna neilo awm lohna, mi hrisel leh hlim chenna, ram hausa, hnam dang ten tlawh an chak ram dinpui atan mitin kan sawm che u a ni.
Tun hi duhthlanna hun a ni e.
Post a Comment