Aizawl 1st November, 2017: Vawiin khan PRISM chuan hun rei tak atanga kan lo buaipui tawh zofate infiamna lama hmasawnna tak tak tur Sports Policy chu kan duang fel a, he hun kaihruaitu Pu Vanlalruata, President PRISM chuan, “Infiamna lama hma nasa taka kan sawn theih nan hma kan la nasa dawn a, kan sorkar hunah chuan infiam mite tan budget-ah sum tam tak kan dah dawn a ni,” a ti.
Pu Ruata chuan, “Tuna sorkarna fawng vuantu congress hian kum 2008 MLA inthlan dawna an manifesto-ah khan Sports Policy siam an tiam a. Tha taka bawhzui anga langin hun reilote chhungin policy an duang (draft) zo thuai a, mahse, 2013 inthlan dawn thlengin he policy hi pass chu sawi loh, Assembly House-ah pawh an pharh lo. Kum 2013 inthlan dawna an manifesto-ah phei chuan sports policy hi an ziak lang ngam tawh lo hial a, a lan danah chuan policy mumal tak neia awmze neia hmalak aiin policy nei lova an duhsak zawngte duhsak theia kal mai mai hi kan sorkar neih tawh te duh dan niin a lang ber a ni,” a ti a. “Kum 2010 chho atangin 2016 Rio Olympic-ah Mizoram atangin infiammi tirh ve ngei an tum thu an aupui dum dum a. 2016 Rio Olympic hun a lo thleng a. Infiammi pakhat pawh Mizoram Sorkarin a tir lo. Hei hi eng dang vâng ni lovin Sorkar hian policy a neih loh vâng a ni. Olympic Vision 2016 nei a, 2016 Rio Olympic-a Mizo infiammite tirh ve ngei an tum thu 2010 chho a aupui tu khan, June ni 23, 2016 khan Mizote Olympic a kan tel ve theih dan tur an ngaihtuah ve leih leih chauh a, Sorkarin policy a neih loh chhan hi ruling party-in policy an neih loh vâng a ni,” a ti bawk.
PRISM Sports Policy hi a duangtu Pu B Vanlalhruaia’n pharhin a sawifiah a, “PRISM chuan infiam mite kan ngaihpawimawh em avangin Sports Policy nei turin sorkar kan lo nawr fo tawh thin a. Sorkar berin a ngaihthah zel avangin kan infiam mite dinhmun chu heti lek hi a la ni a. Hei hi keini chuan siamthat kan duh a, infiamna thei te tan infiamna hi eizawnna tham, dinchhuahpui thamah kan chantir dawn a. Lehkhazirna lama hlawhchham, infiamna thei si te tan pawh zirna lama an promotion theih dan tur thlengin kan ruahman fel sa a ni,” a ti.
PRISM chuan kristianna hi a tha bik a ni tih lantira kan Pathian chawimawi tur te; kan chhehvel hnamte aia ropui zawk kan nih lantir tur te; Zohnahthlakte inpumkhatna atana kan unaute hipkhawm tur tein Mizorama ram ralmuang, dik leh fel taka ro inrel, hna neilo awm lohna, mi hrisel leh hlim chenna, ram hausa, hnam dang ten tlawh an chak ram dinpui atan mitin kan sawm che u a ni.
Tun hi duhthlanna hun a ni e.
Source: http://myprism.in
Post a Comment