Lelte Weekly Editor C.Dinthanga Chanchin (Mizo Milarte)

C. Dinthanga

Mizo zinga chuan Lelte Chanchinbu hrelo kan awm kher awm lo e. Thalai tam takin an ngaihzawn Lelte Weekly hi a Editor Pu C. Dinthanga chanchin kan hre duh ngeiin ka ring. Pa invawng fel tak, smart le polite tak a ni. Mizo zinga chuan rimawi lama thawh hlawk berte zinga mi a ni ti hre bawk ila. 

Zorama kawng hrang hranga mi lar ber pakhat C. Dinthanga hi hla phuah thiam tak, Zawngauva fapa 11 zinga naupang ber niin Saron Vengah, kum 1956, July ni 15 khan a piang a. A pa dungthulin amah pawh hian hla a phuah thiam hle a, hla phuah thiam bakah zai lamah hnuhma a nei nasa hle bawk. 

 A nu chu Biaktluangi a ni a. Zirna lamah BA a passed a. A nupui Lalngurthangi nen fa 2 an nei. Mizorama rimawi lam chanchinbu hlun tak, Lelte chanchinbu neitu leh editor a ni. Kum 1975 ah rimawi lamah a inhmang chho tan a, hla 100 chuang zet a phuah tawh. A hla phuah zingah, ‘Danglam ngai lo Lal Isua, Tuai duh lawmlai valte, Thamam, Krismas chibai ka buk a che, LM min ngaidam rawh aw tihte chu a hun laiin a lar hle thin.

 Kum 1980 vel atangin zai lamah nasa takin  a bei chho va, Radio-ah hla 70 zet a record tawh a, ama mimal audio cassette  pawh 3 a siam tawh. A chanchinbu tihchhuah, Lelte chuan kum tin thu leh hla, zai thiamte lawmman Lelte Award chu a sem thin a, mite ngaihsan a hlawh hle.

 Amah hi pa fel tak, mi zaidam leh kawm nuam tak a ni a. Tunlai thangthar te chuan a zai thiamna lam hi an hre vak tawh lo mai thei. Zaithiam te chhawm chhuah (promote) lamah hian talent a nei tha em em a. He a talent neih hian a zai thiamna lam a khuh zawk mah mah emaw ni chu a tih theih. Zai thiam tam tak han kawm chian hian, C. Dinthanga kaihhruaina hnuaia lo zi chhuak an nih thu sawi an tam hle.

 

 Kum 1985 atang khan kum khat danah Miss Aizawl Contest a buatsaih thin bawk. 1987 khan India ram khawkheng tuarte tanpui nan concert a siam a, film star lar Dev Anand chu a chah chhuak bawk. 1991 atang khan a khat tawkin tanpui ngaite tanpui nan Milar show a buatsaih thin bawk. 1985 khan International Youth Festival, Moscow-a neih chu India aiawhin a kal a, 1990 khan Indian Firm Foundation bultumin South East Asia a fang bawk. Khawvel ram hrang hrang 20 lai fangin a zin chhuak tawh a. Hetianga mi taima, ama chemkalna lama hlawhtling khawpa bei nasa hi, Mizo zinga entawntlak ber pakhat a ni. A nupui, Lalngurthangi leh fapa 2  nen, Saron Veng, Aizawl-ah an cheng. 

Source: Lalremruata Ralte