Aizawl, 24/11/2017: Health Minister Pu Lal Thanzara chuan State Referral Hospital Falkawn behchhana Medical College din tum, Mizoram Institute of Medical and Research (MIMER) chu a hlawhtlin ngei a beisei tih leh, Academic Session 2018 - 2019 atangin batch hmasa ber ten zirna an tan theih beisei a nih thu a sawi.
Nimin khan State Referral Hospital bulah Indian Medical Association (IMA) Mizoram Chapter in Falkawna IMA Multipurpose Centre sak an tum lungphum chu Health Minister Pu Lal Thanzara'n a phum a. MIMER hlawhtlinna atan sorkarin beiseina sang tak neiin hma a la tih sawiin Health Minister chuan, ''Kum 2018 - 2019 ah chuan first batch admit theih kan beisei a, tunah Medical Council of India (MCI) Inspection Team in report an pek turah beiseina thui tak kan nghat'' a ti a, medical thilah IMA member te chu ngaituahna senga sorkar finchhuah turin a sawm.
MIMER Principal tura sawm chhuah tawh Dr L Fimate, RIMS a Principal hlui pawhin a hna a zawm tawh tih sawiin Health Minister chuan, ''Medical College a thawktu tur post 629 chuang lakna tur sorkarin a remti tawh a ni'' a ti a, chung post 629 zinga a pawimawh zual bik zirtirtu (professor leh a hnuai lam) leh mithiam dang te lak thuai a nih theih nan sorkarin a bikin Single Window Clearance a ruahman thu a sawi a ni.
Health Minister Pu Lal Thanzara chuan, tunkar tir lama Medical Council of India (MCI) in MIMER an tlawhna report an pe tawh ang leh chumi chungchang diklo leh rintlak lo te Social Media ah thehdarh a ni tih sawiin pawi a tih thu a sawi a, ''Tlin lohna tam tak kan nei a mahse tlinna tam tak kan nei ve bawk. Chik takin MCI Inspection Team in an enkual a an report an la thehluh loh mai bakah an report hi confidential a ni a, report an pe tia sawi hi thudik lo a ni'' a ti.
MIMER chu Health Department chauhin a tihhlawhtlin theih a ni lo tih sawiin Pu Lal Thanzara chuan, Department pawimawh zual leh mawhphurhna nei heng - PHE, Power & Electricity, PWD leh a dang te nen theihtawp chhuaha thawhho angaih thu sawiin, ''Chief Minister leh Council of Minister in Medical College puitlinna atan theihtawp min chhuahpui hi a lawmawmin a phurawm hle a ni'' a ti.
IMA Multipurpose Centre sak tur hi chhawng ruka sak tum niin mamawh hrang hrang dah tum a ni. He centre hi doctor te tan chauh nilo a mamawhtu apiangte tan hman theih tura ruahman a ni a, public private partnership (PPP) mode hmanga sak tum a ni. IMA hi India rama doctor te intelkhawmna pawl lian ber a ni a, member 2,15,000 awm mekin Mizoramah member 700 chuang an awm a ni.
Post a Comment