Mizo striker ṭha an sawi apianga sawi hmaih theih loh tur Malsawmfela'n Mizoram Premier League-ah top scorer lawmman a la dawng lo. Chhinga Veng striker Sawmfela hi a club hlui Chanmari FC hmaah fiahin a awm dawn.
Sawmfela hian MPL ṭan hmain MFA Super Cup-ah goal 11 a khung a, I Day Football-ah pawh goal ruk khungin inelna pahnihah hian top scorer a ni ve ve. MPL-ah pawh Chhingcows striker hian round 7 thlengin goal ruk a khung a, top scorer ni ngei tura ngaih a ni. Amaherawhchu mak takin Sawmfela hian Lungleia round 8 a khelh aṭangin goal a khung tawh rih lo.
Chhinga Veng coach Lalsangzuala Hmar chuan, "Inhliam vangin match hnuhnung ber a khel lo a, tunah erawh a hranpain training kan neih pui a, ṭha takin a khel theih tawh ka ring. Goal khung tura piang a ni a, Sawmfela hi chuan goal a khung leh thuai ang, amah hian rinna ka nghat a, ka hlauthawng lo," tiin Vanglaini a hrilh.
Ramhlun South tlangval Sawmfela'n goal a khung loh rei avangin top scorer nih erawh a harsa tawh dawn. League round-ah Police striker Lalfakzuala leh F. Lalrinpuia ten goal 9 leh goal 7 an khung a, semifinal an khelh ve tho avangin top scorer inchuhna boruak pawh a sang ang.

Post a Comment

Powered by Blogger.