Tûnlai ṭhangthar zinga thu ziak lama mi hriat hlawh chho mek, ṭhalaite 'chek' milzawnga lehkha ziak ṭhin, Mizo contemporary writer Zirsangkima chuan a lehkhabu thar '2 . . . but III!' chu vawiin chawhnu dar 2 hian Hotel Regency Conference Hall-ah a tlangzarh dawn. Mafa Hauhnar chuan he lekhabu hi a tlangzarh ang.
'Ramada19' hlawhtlinpuitu, a hnua a lehkhabu ziah, a hralh chhuah theih tâk loh '2' ziaktu, Zirsangkima lehkhabu thar tlangzarh inkhawm hi Lengzem Editor, Vanneihtluanga'n a kaihruai ang a, Dr C. Lalhrekima leh Darrokima ten lehkhabu thlirlawkna hun an hmang ang. MAL Book of the Year lo dawng tawhtute - C Lalnunchanga leh Lalhruaitluanga Chawngte ten thusawi an sawi dawn bawk.
Zirsangkima lehkhabu tihchhuah vawi hnihna tur; mahse, a lehkhabu ziah pathumna ni si - '2 . . . but III!'-ah hian Essay 10 leh thawnthu tawi 9 leh Novellette pakhat a chuang dawn a. A hma ang bawkin tleirawl, ṭhalaite mil tur, tunlai tak (contemporary literature)-a a buatsaih leh bawk a ni.
Post a Comment