bethsy lalrinsangi photos
Bethsy
Zai chauh an thiam emaw kan ti a, mahse talent dang pawh an lo nei nual a niang, Bethsy Lalrinsangi leh Rosy K. Remsangpuite chu Human Trafficking lam hawia siam, 'WHERE' film-ah kan hmu dawn.
Leitlangpui lamah tunlai hian mihring hmanga sumdawnna lam hawi film buaipui mek a ni a, shooting pawh zawh fel a ni dawn hnai tawh. Shooting hi za a sawm riat vel zawh fel tawh niin, December thlatir lam hian phai lamah shoot hi chhunzawm a ni leh ang. He film-ah hian gospel singer pahnih Bethsy leh Rosy-te hi an chang a, Rosy hi vai nu mihringa sumdawnna lama inhnamhnawih thuk tak lemah a chang a ni. Bethsy ve thung hi chu a bialpain bumin, sum tam takin nawhchi zawrhna hmunah a hralh dawn a ni.
rosy k remsangpuii photo
Rosy
He film-ah hian Mapuia Chawngthu (Leitlang Pictures) pawh a chang dawn, phai lama police Inspector Mizo nula bo lo buaipui bertuah a chang dawn a ni.
"WHERE" film-ah hian Mizo nula pahnih thawnthu thlur bing niin, hna ṭha zawk beisei avanga Mizoram chhuahsana phai lama hna zawng, chumi aṭanga mihring a sumdawnna hmun puia an tal luh dan chanchin a ni. 
He film hi Mizoram Ṭhalai Kristian Pawl (MTKP) buatsaih a ni a, mihringa sumdawnna tih rem a nih theih nan leh, Mizote he lam kawnga kan fimkhur theih nana hmalakna pakhat a ni. 
A thawnthu hi Mizo tlangvalin a lo tawn tawh ngei behchhan leh zul zuia ziah a ni a, amah hi phai lamah hna ṭha tak thawkin a awm ṭhin a, mahse a thawhna aia hlawh tamna zawk a um avangin mihringa sumdawnna khur puiah a intat lut ta a ni. He hmunah hian hrehawm tinreng a tuar a, chung chanchin tarlanna chu a ni ang. 
A thawnthu hi B. Lalbiakvela ziah niin, film hi a direct nghal bawk.  -Vanglaini

Post a Comment

Powered by Blogger.