Mizoram chhungah hnam dang ILP nei lo an lût nasa. Gunda leader an inrawlh thûk.

- H.Ramdinliana
Vice President
MNYF Hqrs.


Mizo National Youth Front (MNYF) Headquarters chuan, report a dawn angin Serkhan to Bagha Road-a Cachar ramri bul, Saiphai Police Check Gate-ah hnamdang Innerline Permit (ILP) nei lote Police Check Gate-a pawisa pea nitin zalen taka Mizoram an lo lut țhin nia sawi chungchang chu kan enfiah a, hei hi thudik a ni tih kan hriatin pawi kan ti a, a țul anga hma la turin Mizoram sawrkar kan phût a ni.
Saiphai Police Check Gate-ah hian auto-rickshaw leh lirthei dang Mizorama lo lutte chu driver-te’n a chuang zawngte tan a hlãwmin police kutah pawisa an pe țhin a, truck lianin cheng sang tel an chawi tih hriat a ni bawk. Mizoram pawn ațanga bungraw lo lut leh Mizoram chhung ațanga bungraw phurh chhuahte chu phalna nei lovin engtik lai pawhin zalen takin an kaltlang reng tih hriat a ni. Hetia lo lutte hi phalna nei lovin Saiphai bazarah leh Bilkhawthlir, Kolasib thlengin an sumdawng țhin a, hei bakah hian hnamdang ILP nei lo lo lut tam tak chu Serlui leh Tuirial lui ruamahte lutin Mizoram thing leh mau an la a, Cachar lamah an tawlhthla țhin a. Thing pawh an zai nasa a, thingzai an phur chhuak tam hle bawk.
MNF Thalaite’n kan hriat danin, helai chhehvelah hian Gunda leader an tih mai Abdul-a, Kalahore khuaa cheng chu a huangtau hle a, Abdul-a hian Vairengte Police check gate leh Saiphai Police check gate hi a kartawn reng a, dipdaltu nei miah lovin a che niin a lang a, Saiphai Police check gate-a hman turin dawhkan a pe (donate) bawk a, hei hi MNF Thalaite’n kan tlawh laiin an hmang nghe nghe. Abdul-a hian hnamdang ILP nei lote chu lehkha a ziahsak țhin a, chung lehkha kengte chu police check gate-ah pawisa pawh chawi lovin Mizoram-ah an lut thei zel țhin niin kan hria a, Serlui leh Tuirial ruama hnam dangin thing an zai rûkte hi Abdul-a tihtir vek a ni tih hriat a ni.
Saiphai Police Check Gate-ah hian police pathum an duty a, thlatin an inthlak țhin. Saiphai Police duty-te hian Aizawl lamah report pein, check gate pal tlanga dân lova hnam dang lo lut an awm loh thu an thlen țhin tih hriat a ni bawk. Hetih lai hian ni 8.11.2017-ah khan Tuirial leh Serlui ruam ațanga an lakkhawm, hruihnang (cane furniture siamna) truck full trip chu Kolasib Group YMA hruaitute’n Saiphai-ah an nangching a, ni thum leh zan thum che sawn lovin an dintir tih hriat a ni. Tin, tun hnaia CYMA bultuma Mizoram puma hnam dang ILP nei lo check-naah mi 200 chuang zet an man a; Ni 18.11.2017-a MZP-in Mizoram hmun hrang hranga ILP nei lo a check-naah mi 150 chuang leh dân lova sumdawng mi 20 chuang an hmuchhuak leh bawk.
Heti tak maia Saiphai Police Check Gate leh a chhehvela thil țha lo tak mai thleng mek hi MNF Thalai chuan ram leh hnam pawikhawihna lian takah kan ngai a, Mizoram sawrkar hian suamhmang misual a thawhpui em ni tih kan zawt a, gunda leader pakhat hnuaia Mizoram police an kûn nia lang hi Chief Minister Pu Lal Thanhawla’n Home Minister Pu R. Lalzirliana kut a phuarsak vang em ni tih kan zawt bawk. Congress sawrkarin heti tak maia Mizoram chhunga hnam dang ILP nei lote a tihuangtau hi a pawi kan ti a, Mizoram huam chhunga gunda leader rawn che vel pawh hi haider lova rang taka titawp nghal turin MNF Thalai chuan kan duh a. Zoram mipui leh pawl (NGO) hrang hrangte’n ‘Ram leh hnam humhalh’ kan buaipui nasat hle laia Saiphai Police Check Gate paltlanga hnamdang ILP nei lo an lo lut zut zut hi a pawi kan ti a, rang taka a țul anga hma la turin Mizoram sawrkar kan phût a ni. He thil thleng hi Congress sawrkarin an titawp duh lo a nih chuan MNF Thalai chu ti turin kan inring reng a ni tih hria se kan duh a ni.
Issued by Mizo National Youth Front Headquarters
Dated Aizawl The 22nd November, 2017

Post a Comment

Powered by Blogger.