Vawiin khan SCERT Auditorium-ah Mizoram EDUSAT Network chu School Education Minister Pu H.Rohluna’n a hawng a; he hunah hian SCERT officials te bakah School Education leh department kaihhnawih dangte aiawhin officials engemawzat an tel bawk a. Mizoram EDUSAT bultumtu Indian Space Research Organisation (ISRO) hnuaia Development & Educational Unit (DECU) Director, Pu Virender Kumar pawh lo telin, Northeast Space Application Centre (NESAC) atangin Scientist Engineer 2 - Anjan Debnath leh S.S.Kundu Rajshekhar - te an lo tel bawk.
Mizoram EDUSAT Network hawnna inkhawm SCERT Director Pi Laldawngliani Chawngthu kaihhruaiah Khuallian Education Minister Pu H.Rohluna chuan tunlai technology thangthar zelah Mizoramah ngei EDUSAT network hawn a ni thei ta chu lawmawm a tih thu a sawi a. India sorkarin zirna a ngai pawimawh viau rualin leilungin a zir loh avang leh inkalpawhnate a tha tawk loh avangin hmun kilkhawr zawka naupangten duhthusamin zirtirna tha an dawng thei lo fo thin a, chumi harsatna sukiang tura leimin leh kawng chhiain a tihbuai ve phak loh satellite hmanga zirtirna pekchhuah a ni thei tur hi Mizoram tan pawh hmasawnna rahbi lian tak a ni, a ti. Minister hian zirlaiten EDUSAT Network an hlawkpui ngei theih nan duhsakna a hlan a; zirna piah lamah sorkar department leh tul dang atan leh chhiatrup thlen thut emaw pawhin he EDUSAT Network hi a tangkai dawn hle avangin a khawl enkawltute pawhin tha tak leh taima taka enkawl turin a chah bawk. Hawnna inkhawmah hian SCERT-in zirlaite zirna pui thei tur science subject bik atan ‘Educational Software’ a siam leh ‘ICT Module’ a bua siam chu Education Minister-in a tlangzarh nghal a ni.
DECU, ISRO Director Pu Virender Kumar pawhin thu sawiin ramchhungah ISRO leh DECU hnathawh leh hmalaknate a sawifiah a, Mizoram-ah EDUSAT Network hawn a ni ta chu a lawmpui takzet a ni, a ti a. Mizoram-ah Satellite Interactive TErminals (SITs) 50 awm tura ruahman a ni a, chung zinga 23 te chu bun fel ni tawhin Krismas hma ngeiin a dang 27-te pawh bun fel vek an tum thu a sawi a; kumtharah sikul tan leh hunah chuan heng SITs hmangin satellite kaltlanga zirna pawh kalpui nghal a ni thei ang, a ti. NESAC Scientist Er. Anjan Debnath chuan technical report a pe a; Pu Samuel Lalmalsawma Sailo, Technical Officer, SCERT chuan lawmthu sawiin hun a khar a ni.
Auditorium-a hawnna inkhawm hman zawhah EDUSAT HUB tur EDUSAT Studio, SCERT Silver Jubilee Building-a awm chu Khuallian Pu H.Rohluna’n a hawng a. He HUB atang hian Govt H/S, Reiek leh SITs dangte chu Education Minister, DECU Director Pu Virender Kumar leh SCERT Director Pi Laldawngliani Chawnthu ten video conferencing hmangin an be bawk a ni.
India sorkar chuan zirna bik atana hman tur Satellite-EDUSAT chu ISRO kaltlangin 20th September, 2004 khan Geosynchronous Satellite Launch Vehicle (GSLV-3) hmangin a kapchhuak tan a. He satellite hmanga zirna pekchhuah a nih theih nana khawl hman turte hi ISRO chuan India ram state hrang hrangah pe chhawng lehin, Mizoram tan pawh EDUSAT khawl cheng nuai 100 chuang man SCERT building-ah bun a ni. He khawl atanga zirna pekchhuahte lo dawnsawn theihna tur SIT hi DIET 8 leh IASE te bakah Mizoram hmun hrang hranga zirna in thlanchhuah 50-ah dah a ni a. He inbiakpawhna hmang hian zirlaite hnenah zirtirna pekchhuah thin a ni dawn a ni.
EDUSAT Network hmang hian zirtirtu emaw, thiamna bik nei (subject expert) ten SCERT atangin zirtirna an pe ang a, chumi an zirtir lai mek chu Mizoram hmun hrang hrang SIT atangin an lo enin an lo ngaithla thei dawn a ni. Chutih rual chuan zirlaite pawhin an hriatthiam loh laite an zawt thei bawk ang a, heng class/lectrue an pekte hi record-a dahthat vek a ni ang a, mamawh huna tihchhuah leh mai theih an ni dawn bawk a ni. EDUSAT hi syllabus mila zirtirna pangngai leh an zirna puitu atan mai kakah sorkar department hrang hrang atanga mipuite hriattur pawimawh puanchhuah nan leh mipuite tana tangkai tur zirtirna hrang hrang inpek nan a tangkai hle dawn a ni. -DIPR Mizoram
Post a Comment