MIMER atana pawimawhte sawiho
Board of Management for Medical College (MIMER) chu nimin khan an chairman Lal Than­hawla, chief minister hoin CMO conference hall-ah an ṭhukhawm a; MIMER atana thil pawimawhte an sawiho.
Chief Minister chuan, hun rei tak aṭanga suangtuah tawh Mizo­rama medical college din tumin a tak a chang hnai thei ta chu lawmawm a tih thu a sawi a, "Medical Council of India aṭanga MIMER hmun tur State Referral Hospital, Fal­kawn an rawn endik tur atana tih tur hmabak awm ang angte sorkarin a rang thei ang bera hmalaka tihpuitlin a tum," a ti.
Lal Thanhawla sawi danin, MCI-in tehfung atana a hman doctor leh nurse dah belh tur te, ICU leh operation theatre hmunhma leh hmanrua tihchangtlun te, mipui tana awlsam zawka Falkawn an kalna tur ngaihtuah te, damdawi-ina mamawh tur kawlphetha leh tui a bik taka ngaihtuahsakte bakah, internet ṭha zawk leh bank dahte chu theihtawpin sorkarin dawn a ni. 
Meeting-ah hian CMC Ludhiana nena thawh dun dan tur te, MIMER atana a bik taka society din dan turte leh board member ruat belhte sawiho a ni a; MIMER dinna tura hmalak tawhte leh hmachhawp mekte chu state nodal officer (MIMER) Dr Jane Ralte-in a lem nen a sawifiah.
Meeting-ah hian Finance minister Lal­sawta, Health minister Lal Thanzara, Finance secretary Lalmalsawma leh Health secretary Lalrinliana Fanai-te an tel a ni. 

Post a Comment

Powered by Blogger.