MLPC Act zir chiangtute'n Report an buaipui mek zel
Mizoram Liquor (Prohibition & Control) Act zir chiangMizoram sorkarin Mizoram Liquor (Prohibition & Control) Act zir chiang tura committee a din, Study Group chuan document hrang hrang an la khawm tawh a, report an buaipui mek.
Mizoram sorkar chuan MLPC Act zir chiang a, thlir lettu tur Review and Evaluation Committee chu July 2016 khan a din a, Committee hian MLPC Act zir chiang turin a la hma deuhin an hria a ni.

Committee-ah hian Excise & Narcotics Minister chairman niin, Excise & Narcotics Commissioner chu secretary a ni a, sorkar aṭangin Excise & Narcotics Secretary, Deputy Commissioner, Assistant Commissioner leh Enforcement changtu Superintendent te, Aizawl SP, Law & Judicial Deputy Secretary leh Under Secretary-te an tel.
Member dangte chu - Prof. Lianzela, Dr Lalchhuanawma Tochhawng, Dr K Lalbiakzuala, Dr C Lalhrekima, Dr Laldinliana Varte, Rev. R Lalengkima, JH Ram­nghinglova, Dominic Lalhmangaiha, KL Liana, RK Thanga, Lalbiakzuala (CYMA), Vanlalrema Vantawl (MJA), Prof. C Lalkima, Rev.Dr K Lalrinthanga, Rev. R Lalrinsanga, Lalnunkunga Sailo leh Lt.Col. Lalramhluna te an ni. 
Review and Evaluation Committee hnuaiah hian Study Group din a ni a, convener chu Dominic Lalhmangaihna niin, member-te chu Dr. C Lalhrekima, Dr. Laldinliana Varte (MZU), Dr. Lalbiakzuala, Salvation Army-a Lt. Col. Lalramhluna, Lalbiakzuala (CYMA) leh Vanlalrema Vantawl (MJA) te an ni. Anni hian tih tur hrang hrang intukin, MLPC Act-in nghawng a neih dan, a ṭhatna leh ṭhat lohnate an zir chiang a ni.
Study Group hian document hrang hrang an la khawm a, chu'ng aṭang chuan MLPC Act zirchianna report an siam mek a, December 2017 chhungin report thehlut hman tura tih an ni.
Report chu Review and Evaluation Committee-ah an thehlut ang a, committee-in a zir chian hnuah sorkarah thehluh a ni ang.
Congress party office bearer-te June 10, 2016-a ṭhukhawm chuan resolution pass in, MLPC Act, 2015 zir chiang tura sorkarin Review & Evaluation Committee din se an duh thu an tarlang tawh a ni.
MPCC OB meeting resolution chuan, "MLPC Act 2015 chu kum khat chhung Mizoramah kan lo hmang ve ta a. He hun chhunga MLPC Act-in Mizoram a nghawng dan zir chiang turin Home Minister-in Review & Evaluation Committee lo din se 
ṭha kan ti. Committee hian uluk takin MLPC Act-in ram leh mipui a nghawng dan hi ṭan lam bik nei loin zir chiang se kan tiin kan duh a ni," a ti.
MLPC Act hi January 15, 2015-ah hman ṭan a ni a, he dan hmang hian March 16, 2015-ah zu zawrh ṭan a ni. -Vanglaini

Post a Comment

Powered by Blogger.