Mizoram People Forum (MPF) chuan nimin khan political party pathum - MNF, Congress leh BJP-te chu an party pisaah ṭheuh MPF leh political part-te thawhhona thuthlung an hlan a, party dang hnenah pawh an la hlan chhunzawm zel dawn.
Thawhhona thuthlung hlan inkhawm buatsaihah MPF general secretary Rev.Dr R Lalbiakmawia chuan, MPF leh political party-te'n kum 2006-a MLA bye-election a awm ṭumin thawhhona thuthlung an siam thu sawiin, "Kum 2008 leh 2013 inthlan dawnah ennawn niin, a ṭum thumna atan kum 2018 inthlan atan ennawn leh a ni. Kan zavaia thawhhona tur atana buatsaih a ni," a ti a; uar leh zuala ṭanho puiah political party-te a sáwm.
Rev.Dr R Lalbiakmawia chuan, thawhhona thuthlung tihhlawhtlin ngei an duh tih sawiin, "MPF-in ṭan kan lak dan tur kan siam a, political education campaign uar taka kalpui a ni. Ram hi Pathian duh zawnga enkawl tur a ni a, party tinte Pathian duh zawnga ram enkawl turin kan ngen. Party induhsaknaa kan ram a kal nasa lutuk hi kan ram hmelma lian tak a ni," a ti.
MPF General Secretary chuan, politics chu sumdawnna anga kalpui ṭan nia a lan thu sawiin, "Ram kan ngaihsak ṭhin loh avangin kan ramin hma a sawn thei lo. Ram pakhatnaah dahin, theihtawp chhuah tlang ila, Pathianin ram min pek hi i hmangaih ang u," a ti a; sum awm ang angte ṭha taka hman a nih chuan nakin lawkah Mizoram chu model state-ah siam a nih theih an rin tlat thu a sawi.
Mizoram chu hmuhsitawma a awm mek thu sawiin R Lalbiakmawia chuan, "Ram kan hmangaih lo a, kan inhmangaih a, ram hmelma kan ni ta zawk. Sum hmanga tlin tumte hi ram hmangaihtuah kan ngai lo. Block leh unit lam pawhin ram hruaitute i nawr lo ang u. Inthlanna thianghlim kan neih chuan ramin hma a sawn ngei ang. Inthlanna a thianghlim chu beisei ang sorkar kan nei thei dawn a ni," a ti.
Congress Bhavan-a thawhhona thuthlung inhlannaah MPCC president Lal Thanhawla chuan, politics inlumlet hian mihring ang khat vekin a hrût rual tih sawiin, "Chhia leh ṭha hriatna nung nen, Pathian ráwn chunga fim taka khelh tur a ni tih hi kan hruaitute min hrilh dan a ni," a ti a; an hruaitute duh dan tak hian mihring ve tho an nih avangin an kal em tih chu a hriat loh thu a sawi.
Lal Thanhawla chuan pulpit aṭanga politician-te chu ram tichhe vektuah puh an nih ṭhin thu sawiin, "Roreltu lam sorkara awm chu 34 kan ni a, a thuneihna kengkawh tur bika ruatte chu 12 kan ni. Chungho chuan kan ram hi kan tichhia a nih chuan pastor sang rual hian a chhiat let eng emaw zata ṭhaa siam thei tur an ni dawn lawm ni tih ka ngaihtuah ṭhin," a ti. -Vanglaini
Post a Comment