Revised National TB Control Program (RNTCP) chuan sorkar laipui thu chhuak angin, Mizorama ngawr (Tuberculosis) veite hnena damdawi an pek ṭhin chu kumin October aṭang khan an tidanglam ang a, chawlhkar khata vawi thum ei ṭhin chu ni tin eia thlak a ni.
State TB Officer hnen aṭanga thu dawn danin, ngawr (TB) veite hnena damdawi pek dan kalphung tharah hian fixed dose combination (damdawi mum khatah TB damdawi chi hrang hrang) hman a ni tawh dawn a; chutih rualin, damlo ṭhenkhat chu an dinhmun azirin kalphung pangngai hmanga enkawl an la awm bawk.
TB damdawi thar FDC hi damdawi petu (DOT provider/treatment supporter) mithmuh lai ngeia ei tur a ni a, DOT provider atan hian doctor-in ṭul a tih dan azirin damlo chhungkaw member zinga mi hman theih a ni. Damdawi an lak zawha enkawl dam an nih aṭanga kum hnih chhung chu enfiah zui zel tura tih a ni.
Sorkar laipuiin India ram pumah TB hmuhchhuah beihpui (active case finding) kalpui tura a tih angin Mizoramah pawh RNTCP chuan kumin July 17–31 chhung khan district panga - Aizawl, Kolasib, Mamit, Lawngtlai leh Siaha district-ahte an kalpui a; TB vei mi eng emaw zat hmuhchhuah a ni.
RNTCP aṭanga thu dawn danin, TB hmuhchhuah beihpui thlakah hian mi awmkhawmna hmun - home, camping centre, hostel, jail, etc. ahte thawktute an kal kual a, TB vei an awm leh awm loh an enfiah a ni. Mi 10,000 chuang endik an ni a, mi 961-te khâk endik niin, mi 11-in TB an vei tih hmuhchhuah a ni. TB vei zinga mi pahnih chu MDR-TB (drugs resistant) vei an ni tih hmuhchhuah a ni bawk.
TB beihpui thlak hi a thawh thumna atan India ram pumah chhunzawm tur a ni a, Mizoramah chuan December 4-18, 2017 chhungin Lunglei, Champhai leh Serchhip district-ahte kalpui a ni ang. -Vanglaini

Post a Comment

Powered by Blogger.