MIZORAM SYNOD CHOIR CHANCHIN (HISTORY)

Kum 1981 Synod chuan Synod Ramthar Board rawtna angin kum 1983-a Sapram (Wales) tlawh tùra Mizo Gospel Team Synod-in buatsaih se tih chu tha tiin a pawmpui a; a tihhlawhtlin dàn chu Executive Committee kutah dah a ni a. (Synod 1981 Gen.45). Hemi bawhzui hian Synod Executive Committee chuan Leader Pu V.L. Zaithanga hruai tùrin an vaiin mi 18 kal tùra tih ni se, a bâk ngaihtuah ngai chu Officer’s Meeting-in lo bawhzui tùrin a dah ve leh chhâwng a. (SEC 76:XLI of 5.2.1982). Tichuan, Officer’s Meeting thuchhuak chu SEC-ah thlen leh a ni a, zaipawl member 15 nei chu siam fel a ni ta a, Conductor atan Pu C. Thansiama ruat a ni nghe nghe.(SEC 77:13 of 2.4.1982). Pu C. Thansiama hian rokhawlhna a neih avàngin a aiah SEC chuan Pu Rinzawna a ruat ve leh ta thung a. (SEC 87:3(12) of 9.2.1983).

He zaipawl hi Synod din a ni a, a enkawltu pawh Synod bawk a ni a, K.T.P. a inrawlh lo niin a lang. Zaipawl nghet tùra din pawh a ni lo va, 1983-a Sapram (Wales) fang tùra din mai a ni nghe nghe. Kum 1983-ah chuan an zin thei ta lo a, 1984-ah an zin ta thung a ni.

Synod hnuaiah phei hi chuan Zaipawl a awm chho deuh reng zâwk a. Kum 1929-a Sylhet fan hnuah phei kha chuan Zaipawl hi a awm chho deuh reng a, kum 1933-ah Lahore an fan te, 1963-1964 inkára South India (Kerala) an fan te, 1971-ah India khawpui hrang hrang an fante khán Mizo Zaipawl hming an pu deuh ber. Kum 1972-ah khán chuan Synod Mission Board-in Ramthar Zaipawl a din ve thung a. 1972 leh 1973 chhûng khán Manipur, Nagaland, Assam, Cachar phai leh Orissa te an fang a ni. Kum 1975-ah Presbyterian Youth Fellowship (PYF) Inkhâwmpui, Jowai-ah an zai leh bawk.

Hemi hnu hian ZEF Standing Choir kha August 1973 khán a lo ding ve leh ta a. Kum 1976-a India ram an fante, 1978 leh 1980-a Sapram an fante khán Zaipawl \ha tak duhna rilru chu Kohhran miteah a tuh hlë ni chuan a hriat.

Kum 1975 Synod Executive Committee chuan Assembly Golden Jubilee, kum 1976-a awm tùr atán Synod Zaipawl intirh ve ni se, KTP-in lo buaipui se tiin K|P kutah a dah a. (...........) KTP chuan Aizawl Branch hrang hrang atangin zaithiam an sâwm khâwm a, member 40 vêl awmna an din ta a, Assembly-ah chuan an zai ta a ni. Kum 1981 khán KJP Synod hnuaia thalai conference, Mawkyrwat-a hmanpui tùrin Central KTP chu sàwm an ni a. Committee chuan kal tha a ti a, zaipawl nei thei nghâl tùrin kal tùrte a ruat a. (Thurel no.2 of 16.7.1981) Hei hi a hnuah Central K.T.P. Choir tih a ni ta nghe nghe a. October 1981-ah an tum lâwk angin an kal ta a ni. Hemi hnu hian Clark Theological College 10th Anniversary lawmna Mokokchung, Nagaland-ah 20-30 April 1982 khán an kal leh a. Chumi hnu chuan Kanghmun Bial Conference leh Silver Jubilee hmangin an kal leh a, Reiek, Darlung leh Sateek te an tlawh nghâl nghe nghe.

Amaherawhchu Central K.T.P. Choir hi standing choir a ni lo a, Kanghmun Bial an tlawh hnu hian a tâwpzui ve ta mai niin a hriat. Standing Choir din rawtna hi a awm zeuh zeuh naa \ül loa ngaih a ni deuh reng a ni.

Tuna Mizoram Synod Choir kan tih tâk, K.T.P.-in a lo din dàn tobul chu heti ang hi a ni e: M.K.T.P Committee, Synod Committee Room-a ni 23.4.1985 a thukhâwm thurel no.2-naah chuan tihian ziak a ni:

India ram fang tùr zaipawl din:

Hemi thu lo luh dàn chu heti ang hi a ni. India rama mi hausa pakhatin thla thum chhûng vêl, India ram fang tùra Zaipawl member 20-30 emaw inbuatsaih tùra Pastor Biaktluanga Pachuau kaltlanga a sàwmna thu leh senso zawng zawng tum vek a inhuam thu nen hriat a ni a. Ngun takin kan ngaihtuah a. Rintlaka pawm ngam tùr niin kan ngai a. A hun thu sawi fiah chiah a ni lo va. Favang lam hun erawh chu niin a lang. Kal thei tùra inbuatsaih nghâl tha kan ti a. Hemi chungchanga dâwr chian ngai apiang Gen. Secy-in lo dâwr chiang se la. Synod Executive Committee remtihna pawh lak ngei \ülin kan hria a. Zaipawl hming atán pawh Mizo Gospel Team tih ngei tha kan ti a.

Zaipawl body siam tùrin he’ng mite hi kan ruat. 1. Pastor Lalbiaktluanga, Leader

2. Upa Lianzela, Asst. Leader

3. Upa K. Lalhmingliana, Gen. Secy.

4. Upa Lalbiaktluanga, F. Secy.

5. Pu Rinzawna, Treasurer

6. Rev. Lalsawma, Exe. Secy. i/c K.T.P.

7. Pu Lalchungnunga, Asst. Secy.

tiin.

He thu hi Rev. C. Rosiama, Leader a nih lai leh Upa K. Lalhmingliana Gen. Secretary a nih laia mi a ni a; zaipawl member thlang tùra an ruat Pastor Lalbiaktluanga hi Leader tih a ni bawk. Pastor Lalbiaktluanga hi Leader thar tùr, Rev. C. Rosiama thlaktu tùr a nih avàngin an ruat lâwk niin a lang. 

May 24, 1985-a MKTP meeting thurel No. 3-naah chuan an din tawh thu leh member pakhat an ruat zínga miin a phat thu leh a aiawh tùr an ruat thu a lang a. Heta an ruat thar, C. Lalmuankima, Mission Veng bâk hi Minute buah zaipawl member hming hmuh tùr a awm lo.

Hetah hian zaipawl hmingah Mizo Gospel Team tih an han hmang leh kher hi a mak ang reng hlë a, a hmaa Synod-in Sapram fang tùra a din hming chiah kha hman zui a ni a. A hming vuah thuah hian an inhnial viau a ni mahna. Zaipawl hming atán pawh Mizo Gospel Team tih ngei tha kan ti a tiha ngei an han hman atang hian an inhnial viau chu niin a lang. He hming ngei hmanga K.T.P.-in zaipawl an han din leh kher pawh hi mak ang reng tak chu a ni.

Hemi hnu hian zaipawl tùra an lak zínga member thenkhatte sorkar hna thawk an nih avànga remchang leh ta lo an awm nual thu te, a hnu zëlah chuti ang chu an la awm a nih pawhin Gen. Secy, Conductor leh Rev. Lalsawma te’n a thlakna tùr lo ruat fel mai thìn tùra an tihnate leh Committee pawmpui tùra thlen tùra an tihnate a lang leh a (Vide Thurel No. 9 of 26.6.1985). Chumi hnuah chuan Nl. Lallawmchhungi leh Nl. Lalnuntluangi te’n an theih leh tâk loh avànga Nl. Lalduhawmi (Republic) leh Nl. Lalrosiami (Mission Veng) te an lak thu leh an pawmpui thu a lang leh a. (Vide thurel No. 9 of 24.7.1985)

A tira zaipawl member an ruatte hi Central Committee-in an pawmpui lo nge minute buah an hming hmuh a ni lo a; chutih laiin an aiawh tùr an ruatte erawh chu Committee pawmpui thlap thlap an phùt lawi a. Member te hming an ziakna lai tak hi a bo pawh a ni mai thei. May 24,1985-a an meeting leh hma hian April 30, 1985-ah Leader charge inhlan a ni a, he charge inhlanna hi phek khat chauh a lang a, laklawh deuhin a tawp a, minute bu phek bo chu a awm ngei niin a lang.

Tichuan Mizo Gospel Team chu vai hausa sihhmuhna bawhzuia din a ni a, he vai hausa hi minute buah a hming tarlan a ni lo na a, kum 1984-1985 K.T.P. Report, Synod-a thehluhah chuan Earnest Sant Singh, Pachgani-a mi a nih thu tarlan a ni a. Amaherawchu eng emaw rokhawlhna avànga an kal leh tâk rih loh thu tarlan a ni bawk. (Synod Bu 1985, p-151)

An tum anga an zin leh theih tâk lohah NEICC Youth Assembly, Jaiaw-ah October 24-27, 1985 khán an zu zai phawt a, a hnuah Lunglei lamah December 9-12, 1985 chhûng khán zinin Chanmari Veng Kohhran hawnnaah te an va zai ta rih bawk a. An din chhan ber a tlawlh tâkah chuan Central Committee chuan a kal zël dàn tùr an ngaihtuah a, Oct. 1986 thlenga ding zui zël rih tùra tih a ni a, rawngbàwlna kawng a inhawng a nih chuan a tül anga la ngaihtuah tùrin an rèl leh a, a nihphungah chuan Standing Choir anga din tha an tih thu ziak lan a ni. (Vide thurel No. 7 of 16.12.1985). June ni 6, 1986 khán zaipawl member te an ruat tha nghe nghe a, Zaipawl Leader leh Conductor te tel loin member 23 an ni.

Standing Choir anga din an rèl fel tawh chu a rintlak tâwk lo an ti nge 28.10.1986-a an meeting-ah chuan Gospel Team kan neih mekte hi Standing Choir anga neih ni tawh se.... Heti anga Standing Choir anga Gospel Team siam a lo nih dáwn avàngin member zat tùr atán pawh mi 20 ni se. Member te pawh siam thar vek ni se, kan ti (vide thurel no.5-na) tiin an rèl tha leh a, Standing Choir a nihna chu an nemnghet chiang a ni ber mai. Tichuan, June ni 6, 1986-a member an siam that pawh chu November 18, 1986 khán an siam tha leh ta a ni.

Rawngbawlna kawng pawh a inhawng chho ta zël niin a lang. Bible Society of India kum 175 tlin champhaphak lawmna, Delhi-a zai tùra sàwm an ni ta a, Delhi mai ni loin Agra, Allahabad, Calcutta leh Shillong-ah te 17th September-18th October 1986 chhûng khán rawngbàwlna an nei ta a ni. Musical Drama The Prodigal Son tih chu an chhuah thìn bawk.

Zaia rawngbàwl mai bâkah lemchan lam pawh an keng tel chho ta hial a. Kum 1987-ah chuan zaipawl member 20 bâkah Drama Wing member 10 an awm a ni. September 22-30, 1987 chhûnga Nagaland-a Zunheboto khuaa Home Conference cum Revival hour hmangin an kal nghe nghe.

Mizo Gospel Team tih hming chu remchang lo deuha hriain thlak rawtna a awm a, C.K.T.P. chuan Synod Executive Committee-ah rawtna thlen ni se, tiin a rèl a. (Thurel no.4 of 29.6.1989). SEC hi an thut hman mai loh avàngin ngaihtuah mai a ni lo a. Hetih lai vêl hian English Cassette an siam bawk si a, a kâwma hming ziak dàn tùr a buaithlak deuh avàngin a hmaa Committee-in a lo rawt tawh Mizoram Synod Choir tih chu hman zui mai ni se, tiin cassette kâwmah pawh hman nghâl mai ni se, tiin an hmang ta nghâl a ni. (Thurel No. 2 of 8.9.1989). Kum 1989 tàwp lam khán Synod Executive Committee chuan Mizo Gospel Team tih chu Mizoram Synod Choir tia thlak a remti zui ta bawk. (SEC 116:45 of 3.11.1989) 

Zaipawl term hi a tir lamah nghet taka siam a ni chiah lo a, Committee-in tül a tih ang zëlin a siam mai \hìn niin a lang. Kum 1991-ah chuan term nei vein Central Committee term kalphung hi zui se la, term khat kum 2 niin member pakhatin term hnih (kum 4) aia tam hman loh ni se, tül bîk a awm erawh chuan kum 4 aia rei pawh awm theih tiin a kalphung tihdanglam a ni ta. March 6, 1991 atanga hman \an tùra tih a ni. (Thurel No. 8 of 6.3.1991)

Zaipawl enkawl hna hi Central K.T.P.-in a thawk chhunzawm zël a, zaipawl rawngbàwl dàn tùrte ruahman felin mumal taka enkawl a ni. Zaipawl nung tak, memberte pawh inpe tak an nih avàngin an rawngbàwlna pawh mite’n an hlut êm êm a, ram chhûng leh pawnah hriat an hlawhin rawngbàwlin an hmanhlel hlë a ni. Inkhâwmpui pawimawh zawng zawng- Assembly, Synod, K.T.P General Conference, Kohhran Hmeichhe Inkhâwmpui Lian, NEICC, NEICCYA, PYF-ah te rawng an bàwl thìn a ni. He’ng bâkah hian anmahni remchan dàn nen a inmil chuan Kohhran mal leh Bial huap programme-ah pawh an tel chamchi a ni. Ram chhûnga an rawngbàwlna phei chu sawi vek sen a ni lo.

Kan sawi tawh bâka Mizoram Synod Choir rawngbâwlna pawimawh zual deuhte chu heti ang hi a ni. (Kual khung chhûnga mi hi a kum a ni)

1. Churachandpur-ah Assembly-a rawngbàwla an kal tumin Manipur Synod Ramthar hmun hrang hrang tlawhin Imphal-ah Bible Tract an sem. (1988)

2. Dr. Billy Graham Evangelistic Associate buatsaih, ‘Bangalore East Convention’ Bangalore-ah an tel a, Video Recording an nei nghâl. Delhi leh a chhehvêl hmun hrang hrang an fang a, Delhi Doordarshan TV Programme-ah Mizo hla 5 an khung. Zaipawl Cassette (English) an siam. (1989)

3. Dr. Billy Graham Evangelistic Associate bultumin Shillong-ah rawng an bàwl, film shooting an nei. Billy Grahama páwlte hian Keyboard leina tùr Dollar 1000 an pe nghe nghe. (1990).

4. Tangsa Presbyterian Church Conference hmanpuiin Lakla-ah an kal. NCCI Quadrennial Assembly, Pune (UBS)-ah rawng an bàwl. Spicer College, Pune, YMCA Hall, Bombay leh Bishop’s College, Calcutta-ah hun an hmang bawk. (1991)

5. Delhi Mizo Inkhâwm huaihawtin Delhi khawpui hmun hrang hrangah rawng an bàwl. President, Vice President, Prime Minister leh Lok Sabha Speaker te hmaah an zai nghe nghe. Delhi Doordarshan leh AIR bakah Guwahati Doordarshan-ah hla an khung. Audio Cassette “En r’u, Beram No” an siam (1995)

6. Guwahati Doordarshan-ah hla 6 an thun. (1996)

7. Presbyterian Church in Taiwan (PCT) Kohhran hrang hrang 10 an tlawh. Church of Christ in Taiwan, Bangkok an tlawh nghâl. (2000)

8. Presbyterian Church of India (PCI) Platinum Jubilee hmangin Shillong-ah an kal. Guwahati Doordarshan-ah hla 5 an thun. Kokata Goodnews Festival hmangin an kal bawk (2001)

9. KJP Synod, Sutnga-ah rawng an bàwl. (2002)

10. Audio Cassette “Mere Geeto” (Hindi, Bengali leh English hla awmna) an siam. NCCI buatsaih, National Ecumenical Youth Assembly, Nagpur-ah an kal. St.Peter’s Telegu Church sàwmnain Banglaore-ah Festival of Music 2003 an hmang.(2003).

Source: CKTP