Mizoram Taekwondo Association tirha kal te chuan 36th National Kyorugi & 9th National Poomsae Taekwondo Championship-ah gold pasarih, silver panga leh bronze pali lain an champion.
Jammu and Kashmir-a neih inelnaah hian state 30 leh central services panga (SSCB, SSB, Assam Rifle, CISF, CRPF ) aṭangin infiammi 1800 an inlan a, Sikkim chu pahnihna niin a thlengtu J&K leh Services te chu pathumna an ni.
He championship-ah hian Kyorugi leh Poomsae inelna hrang awmin Kyorugi ah category 16 awmin Mizoram hi category 13-ah a khel thei. Vipan-a'n Kyorugi-ah hian silver medal a la.
Asian Games a telh tur Poomsae inelna hi category 3 (Regular Poomsae, New Poomsae leh Freestyle Poomsae) ah te ṭhen a niin category tinah hian individual, pair leh team inelna a awm zel. Mizoram hian regular poomsae - gold pahnih, silver pakhat, bronze pali an la a. New poomsae-ah gold pahnih, silver pathum an la; Freestyle poomsae-ah gold pathum leh silver pakhat an la bawk. Mizoram team hi MATA GS Joseph Thansanga (SYS), technical secretary R. Lalchhandama(MSSC) leh Joseph Lalsiama(SYS) ten an hruai a ni. -Vanglaini

Post a Comment

Powered by Blogger.