India rama vaihlo zûk leh hmuam dinhmun tarlanna, Global Adult Tobacco Survey (GATS) thar ber chu November 24, 2017 khan tihchhuah a ni. GATS thar bera a lan danin, Mizoramah vaihlo zûk leh hmuam ti zat an tlahniam a, GATS 2009-2010 : GATS-1 ah 67.2% a nih laiin, GATS 2 : 2016-2017 ah chuan 58.7% a ni. Hetih lai hian, national average chu 28% a ni thung.
GATS-2 report-a a lan danin, Mizorama zûk leh hmuam ti zinga 25.1% chuan meizial chauh an zû a, 24.3% chu a hmuam lam ti ṭhin an ni a, 9.2% chuan zûk leh hmuam chi an ti kawp a ni. Meizial zu zingah 54% chu mipa puitling niin, 14.3% chu hmeichhhe puitling an ni a; hmuam chi ti zinga 21.3% chu mipa niin, 52.4% hmeichhia an ni.
Meizial zû zat 5.3%-in a tlahniam a, hmuam lam ti zat 7.2%-in a tlahniam thung. Vaihlo zûk leh hmuam ti ṭhin tlakhniamna chu point 8.5 a ni. Kum naupang lamah pawh chíng thar an tlem hret a; kum 15-17 inkarah zûk leh hmuamin hniam lam a pan a, GATS-1 ah 35.4% a nih laiin, GATS-2 ah chuan 27.0% a ni tawh. Zûk leh hmuam chin ṭan kum (age of initiation) chu kum 17.4 aṭangin kum 17.8-ah a chho tawh bawk.
Mi meizûk khu mi dangin an hîp luh (second hand smoke) chungchangah Mizoram chuan hma sawn mah se, hmarchhak state zingah a sang pawl a la ni. Chenna ina meizial inzûk khum awm zat chu chu 95% aṭangin 84.1%-ah a tlahniam a, hna thawhna hmuna meizûk pawh 64.6% aṭangin 44.5%-ah a tlakhniam bakah, vantlang hmuna meizûk chu 27.3% aṭangin 18.2%-ah a tlahniam.
Meizial (packed cigarette) man atana mi pakhat zelin thla khata sum an hman chu thil man to zel (inflation) nena chhûtin, Rs. 712.6 a ni a, GATS-1 ah chuan Rs. 1,201.5 a ni. Zozial man atana sum hman erawh a pung thung a, GATS-1 ah Rs. 256.1 niin, GATS-1 ah Rs. 189.8 a ni.
Meizûk sim tum an pung nasa a, GATS-1 ah 16.7% a nih laiin, GATS-2 ah chuan 53.5 % a ni. A hmuam chi ti zingah GATS-1 ah 25.8%-in nghei an tum laiin, GATS-2 ah chuan nghei tum 71.2% an awm. Zial báwma a hlauhawmna tarlan an hmuh ṭhin vanga sim duh 17.5% an awm a, vaihlo hmuam chi-ah pictorial warning vanga sim duh phah 26.0% awmin, an punna zat chu 6.3%-a a ni. Media lama vaihlo ṭhat lohna hmu ṭhin 74.2% an tling bawk.
India hmarchhak state zingah Tripura chu vaihlo zûk leh hmuam hluarna ber state a ni a, GATS-1 ah 55.9% a nih laiin, GATS-2 ah 64.5%-ah a pung. Sikkim chu zûk leh hmuam ti tlemna ber leh hmasawn ber state a ni a; GATS-1 ah zûk leh hmuam ti 41.6% an awm laiin, GATS-2 ah chuan 17.9%-ah an tlahniam tawh a ni.
Assam-ah pawh zûk leh hmuamin hluar lam a pan a, a ti zat pawh 32.7% aṭangin 41.7%-ah an pung. Hmarchhak state zingah Sikkim, Nagaland, Mizoram leh Meghalaya ten hma an sawn a, Arunachal Pradesh leh Manipur-ah hmasawnna sawi tham a awm lo a, Tripura leh Assam-te chu hmasawn zawnga kal loin, a chhe zawngin an kal thung.
GATS-2 NE States Fact Sheets tlangzarhna hi November 24 khan Assam Administrative Staff College, Guwahati-ah neih a ni a, hmarchhak state tin aṭangin palai telin, Mizoram aṭangin Mizoram State Tobacco Control Society official mi pahnih leh chanchinibumi pakhat an tel a ni.-Vanglaini
Post a Comment