Mumbai khawpui hi Bombay a nih lai atang tawhin Mizoten an lo bel ve thin a. Tunhma atanga tun thlengin Mumbai khawpuia cheng Mizote hi chi thumin a then theih a. Pakhatnaah chuan hnathawk- sawrkar leh private a thawk. Pahnihnaah Sipai a tang (Navy leh Army) te leh pathumnaah chuan Zirlaite an ni tlangpui. Hmun changkang tak a nih rualin ei leh in khawsakna a hautak em avangin zirlaite an pung tam thei em em lo. Hostel chang lo tan chuan inluah man senso a sang hle a, tlin a harsa a ni.
He khawpui hi Mizo khawtlang nun hlim leh nuamti tlang takin an khawsakna hmun a ni a. Pawl te dinin mumal nei takin an inhuikhawm thin. Bombay Mizo Welfare & Cultural Association (BMCWA) hi June 30, 1983 tlai dar 4:30 –ah Mizo awm ang ang inhmu khawmin an din a. Inthlanna pawh nei hran lovin hruaitu tur an inruat a. Vawiin ni thlenga kan HRUAITU HMASATE a hranpa a en theih a ni. A tir te atangin Bombay Mizo Welfare & Cultural Association leh Mizo Inkhawm (Bombay Mizo Christian Fellowship) hi inbelh bawm tlata kalin hotute pawh mihringah an intawm vek a (designation tih danglam ni mahse). August 15, 2000 atangin BMWCA hi Mumbai Mizo Association (MMA) tia thlak a ni.
December 19, 2004 khan kum thar atanga hman turin kan inrelbawl dan tih danglam a ni a. Chumi ang chuan Mizo Association leh Mizo Inkhawm chu inpawh zawm tho siin hruaitu hran nei tawh tur a ni a. Tin, Zirlai leh Thalaite lam mamawh luhthuk pui thei tur te, khawtlang thil leh inkhawm rawngbawlna thlenga enkawltu tur pawl, Mizo Students and Youth of Mumbai (Thalai Pawl) din a ni ta bawk a. Heng pawl 3 te constitution pakhat (intawm) hmanga thlun khawm vek an ni a, a khaikhawmtu (umbrella body) chu MUMBAI MIZO ASSOCIATION hi a ni.
Khawpui changkang Mumbaia awm kan angin thil kan tih apiangah hneh leh tlin taka thil tih kan tum tlat thin a. Chuvangin, keimahni uanna lam ni lovin keimahni kan infuih nan ‘In Mumbai Mizo Association, we do things in style,’ kan ti thin. -Mumbai Mizo
Post a Comment