Myanmar sipai leh Arakan state chhunga hel pawlte inbeih vangin Arakan-a Zo hnahthlak raltlan zinga mi 1,240 vel chu Mizoramah an rawn lut.
Home minister R Lalzirliana sawi danin, Myanmar sipai leh Arakan hel pawl inkahna vanga Zo hnahthlak mi 1,240 vel, Mizorama rawn raltlante chu Mizorama khaw pali - Lungtlangzau, Laitlang, Hmawngbuchhuah leh Zochachhuah-ahte an lut a ni. Raltlante chungchang hi sorkar laipui hotute hriattir a ni tawh.
R Lalzirliana chuan, Myanmar-a Zo hnahthlak rawn raltlante chu November 24, 2017 khan Lawngtlai BDO-in an awmnaah a tlawh a, thil awm dan leh ṭanpuina pek dan tur a enfiah tih a sawi a; raltlante chu Myanmara aṭanga Bangldesh-a raltlan, Rohingya Muslim an tih ang ni loin, Zo hnahthlak vek an nih thu leh, Rohingya Muslim-te chu Mizorama an lo luh a hlauhthawnawm loh thu a sawi a ni.
Myanmar-a Zo hnahthlak rawn raltlante hian November 23, 2017 khan Mizoram an rawn lut a, Mizoram an lo luh dawnah Zochachhuah
V/C President chu phone hmanga biain, an mikhual ngam dawn leh dawn loh a zawt hmasa a ni. Zochachhuah V/C President chuan raltlan, himna zawng an nih avangin ṭha taka dawnsawn an inhuam thu leh Myanmar sipai nena an inkahnaa hliam, Arakan hel panga Aizawlah enkawl mek an nih thu Home Minister chuan a sawi.
R Lalzirliana chuan, Myanmar leh Mizoram inrinaah Assam Rifles an duty avangin Mizoram police-te a hrana duty tir a nih loh thu a sawi rualin, thil awm dan uluk taka an thlithlai reng thu a sawi a; raltlante chu a theih ang anga chhawmdawl an nih tur thu te, a thlawnin ei tur pek an nih tawh thu te, Lawngtlai DC chu FCSCA Director nen inbia a, buhfai pek dan tur ngaihtuah tura hriattir a nih tawh thu te, a ṭul chuan sorkar laipuiah ṭanpuina dil a nih tur thute a sawi bawk. -Vanglaini
Post a Comment