ZNP president Lalduhoma chuan, Myanmar-a Zo hnahthlak, Myanmar sipai leh hel pawlte inbeih vanga Mizorama rawn raltlante lo tuamhlawm chu Mizote tih tur a nih thu a sawi.
Lalduhoma hian nimin khan an party pisaa inkhawmah thu sawiin, "Myanmar aṭanga raltlan Mizorama lo lut mekte lo tuamhlawm hi kan tihmâkmawh a ni," a ti a; Myanmar sipai leh hel pawlte tun hnaia an inkah vanga Mizorama rawn raltlan chu mi 1,500 vel an ni tawh tih sawiin, "Kristian kan nihna ang leh kan unaute an nih avangin kan lo thlamuan a, kan lo ṭanpui hi kan tih tur a ni,” a ti.
Myanmar aṭanga tun hnaia Mizorama raltlante chu Zo hnahthlak, Khumi hnam an nia sawiin Duhoma chuan, "Anni hi kan unaute, kan hnam pasalṭhate'n zalenna an sual lai, an rammut laia lo tuamhlawmtu berte an ni ṭhin," a ti a; Zo hnahthlakte an nih avangin ṭha taka lo tuamhlawm turin Mizoram sorkar a ngen a ni. Lalduhoma chuan, raltlan lo ṭanpui kawngah ZNP-in tih theih an neih chuan an tlanchhe dawn lo tih a sawi a; Mizoram sorkarin hma a laknaah lawmthu a sawi bawk.
ZNP President chuan Zoram People's Movement (ZPM)-a an thawhhona chungchang sawiin, mi rilru tina thei zawnga social media-a thu thehdarh chíng lo turin party worker-te a ngen a, "Mi tinte’n zalenna zau tak kan nei a, inkhap thei kan awm lo. Amaherawhchu, thawhhona tichhe thei zawnga thu thehdarh chíng lo turin kan inngen a ni," a ti. -Vanglaini
Post a Comment