Champhai Zotlanga Sports Stadium sak thar chu nimin khan chief minister Lal Thanhawla'n a hawng. Lal Thanhawla chuan, stadium chu infiamna khawvela Mizo ṭhalaite tana khawvel thar siamna rahbi langsâr a nih thu sawiin, "A hmangtute'n rilru leh taksa hriselna, chhung lam leh páwn lam thianghlimna nen an hman chuan an tan infiamnaa hlawhtlinna inṭanna hmun a ni ang," a ti.
CM Lal Thanhawla chuan, ṭhalaite tan khawvel thar siam an tum chu an tihlawhtling mek tih sawiin, "Khawvel vâng dâpa Mizo ṭhalaite an inzârpharh nan ṭan kan lak zel avangin a hlawhtlinna kan hmu mek a ni," a ti a; Sports Minister hmalakna vangin Mizoram chu sport infrastructure-ah India rama a changtlung ber pawl a ni tawh nia sawiin, Champhai mipuite chu lawm nacháng hre turin a chah.
Chief Minister chuan NLUP chungchang sawiin, ring lo mite thinlungah NLUP hmangin Pathianin hna a thawk nia sawiin, "Min hêk chungin tihtawp a hnêkin state dang pawhin entawn turin an ti hial a ni," a ti a; India rama state hrang hrang, chaw khawpkham ei phak lo tlemna ber state chu Mizoram a nih thu a sawi.
Congress sorkarin ṭhalaite khawvel thar din an intiam tih sawiin Lal Thanhawla chuan, "He hma kan lakna bikah hian games and sports bikah kan hlawhtling hle a, ṭhalaite pawhin an hmang ṭangkai a ni," a ti. Kum 1998 inthlanah Congress party tla lo se chuan Mizoramin Sainik School a neih daih tawh tur thu sawiin, "Kan sorkar leh hnuah hmalak a ni a, tunah chuan Chhingchhipah Sainik School kan nei tawh a ni," a ti.
CM Lal Thanhawla chuan, sorkar laipuiin kum 2013 hnua a tehna aṭangin India rama state ṭhang chak, GSDP 100% aia sanga ṭhang pali (Mizoram, Gujarat, Jharkhand leh Tripura) a thlante zingah Mizoram a tel thu a sawi bawk.
Khualzahawm Zodintluanga, Sports & Youth Services minister pawhin thu sawiin, "Hmasawnna hrang hrang ṭha tak tak ṭhalaite tana kan rawn chhawp chhuah hi chháng let ve turin ka rawn cho che u a ni," a ti a; stadium thar neitute chu stadium aṭanga inzir a, Mizoram leh India aiawh ni turin a fuih.
Zodintluanga chuan, infiamna lamah Mizoramin nasa takin hma a sawn tih sawiin, "Tun hnai ringawtah pawh boxing-ah khawvel inelnaah gold medal an la a, weighlifting-ah Jeremy Lalrinnunga'n Commonwealth inelnaah record a siam tawh a ni,” a ti.
Sports Minister chuan, CM Lal Thanhawla chu a thutiama ding ṭhin a nih thu sawiin, chu chu Mizote vanneihna a nih thu a sawi a, "Zoram mipuite hian a ngaihna hria, mahni thutiama ding ṭhin leh vision nei ṭha CM nei lo ila hetiang hun hi kan hmang lo ang,” a ti a; Zotlanga Sports Stadium sak chu CM Lal Thanhawla'n kum 2007-a a lo tiam tawh tihhlawhtlinna a nih thu a sawi.
Sports Stadium hawnna inkhawmah hian minister KS Thanga leh MLA TT Zothansanga te pawhin thu an sawi a; minister Vanlalawmpuii Chawngthu-in a ṭawiawm bawk.
Technical report petu Vanlalmawia, UDPA joint secretary-in a tarlan danin, Sports Stadium sak nan hian 10% Lumpsum Grant for North Eastern Region hnuaiah September 4, 2013-ah Ministry of Urban Development aṭangin cheng nuai 2238.69 hmuh a ni a, bialtu MLA JH Roṭhuama’n September 18, 2013-ah a lungphùm a phúm. Executing agency - UDPA department hnuaiah National Building Construction Corporation Limited.-in March 15, 2014-ah hna ṭanin December 30, 2016-ah siam zawh a ni.
Champhai Zotlang Sports Stadium:
@Football ground metre 100X60-a zau a awm a, phûl lem phah a ni.
@Intlansiakna tur synthetic track lane 8 siam a ni a, a area chu sq.metre 4,108.48 a ni.
@Khelmual sir tluanin mi 3,500 ṭhut theihna gallery a awm a, RCC-a siam a ni.
@VIP gallery a chung nei a awm a, mi 100-150 vel an ṭhu leng.
@Boxing hall, sq.metre 400-a zau a awm.
@Infiammite inthlakna leh chawlh hahdamna room hmeichhia leh mipa tan VIP gallery hnuaiah dah a ni.
@Motor parking, two wheeler 200 vel leh LMV 50 vel dah theihna a awm.
Post a Comment