MPC party chuan thuchhuah siamin, ṭangrual pawl, Zoram peoples’ Movement (ZPM) hmalakna chu Mizoram district hrang hrangah a ṭhang duang hle niin an tarlang a, lawmawm an tih thu an sawi.
MPC thuchhuah chuan, "Kan ram tlukchhiatna vanga Zoram mipuite manganna sukiang tura ZPM hmalaknate hi hlawhtling taka hlenchhuah a nih ngei theih nan Zoram mipuite ṭawiawmna kan ngen tak meuh a ni," a ti.
MPC party chuan, tun hnaiah Myanmar sipai leh Arakan hel pawlte inkah vanga mi eng emaw zat Mizorama an rawn raltlan ngai khawpa Zo hnahthlakte'n buaina leh manganna an tâwk chu an lainat thu an sawi a, "Kan Zo hnahthlak unaute'n buaina zâkhua an tawh laia Mizoram sorkarin lainat taka lo dawngsawng a, an harsatna leh mangannate chhâwk zângkhai tura a lo buaipuinate hi lawmawm kan ti hle a ni," an ti.
MPC chuan, Myanmar aṭanga raltlante chu tuna an awmna hmunah thlamuang taka an khawsak theih nan venhimna ṭha tak pe tur leh chhawmdawlna ṭha thei ang ber ngaihtuahsak turin Mizoram sorkar an ngen a; ram dan leh kaihhruaina anga register mumal tak nen ûm zui a, hun kal zela harsatna awm thei lakah fimkhur taka hma la turin sorkar an ngen bawk. -Vanglaini
Post a Comment