Mizoram sorkar leh HPC(D)-te'n inremna zawnga an inbiakna kal mekah, inremna tur thuthlung, Memorandum of Settlement (MoS) duan leh Sinlung Hills Council (SHC) Bill duan chungchangah nimin khan Hmar Inpui huaihawtin Sakawrdai community hall-ah inràwnkhawmna neih a ni.Consultative meeting hi Hmar Inpui president Joseph Lalrothanga'n a kaihruai a; HPC(D) working chairman leh inbiaknaa tel Lalthanglien Hmar (LT Hmar)-in HPC(D) leh Mizoram sorkar inbiak dan leh an thlen chinte a sawi bakah, MoS duante a sawifiah.
Thu dawn danin, Mizoram sorkar leh HPC(D) inbiakna kal meka MoS (draft) leh SHC Bill (draft)-te chu sawihoin, MoS draft leh SHC Bill draft-te chu a tlangpuiin ṭha an ti a; chipchiar taka an sawiho hnuah paih ngai leh belh ngai nia an hriatte an siamṭha a, chungte chu HPC(D) palaite'n inbiak leh hunah sorkarah thlen se, an ti.Consultative meeting-ah hian Hmar Inpui hruaitu te, HPC(D) hruaitu te, Sinlung Hills Development Council (SHDC) chairman Hmingchungnunga leh SHDC member te, Mizorama Hmar pawl hrang hrang aiawh te, HPC(D) demand area khaw 19-a V/C leh NGO hrang hrang hruaitute an tel a ni.
Home dept. aṭanga thudawn danin, Mizoram sorkar chuan official leh HPC (D) aiawhte'n inremna tura ruahmanna an siam chu an pawm tawh. Hetihlai hian inbiak leh hun tur tihfel a la ni loa, Mizoram sorkar hotute kutah dah a ni.
Inbiak hun tur hi la tihfel ni chiah lo mah se ruahmanna erawh kalpui mek a ni. HPC (D) peng pakhat Lalhmingthanga lamin inremna-ah telve an duh deuh nia hriat a nih avangin, inbiak leh hun hi tihkhawtlai deuh a ni.
H Zosangber kaihhruai HPC (D) leh Mizoram sorkar official-te chu ṭum engemawzat an inbiak hnuah inremna ruangam an duang a, hei hi sorkar chuan a pawm tawh. HPC (D) hian Mizoram sorkar duhdan angin, Mizoram sorkar silai an kawlte pawh sorkarah an pe let tawh a ni. -Vanglaini
Post a Comment