Yamaha Fiamthu Fest top 5 intihsiak chu Thawhlehni khan zawhfel a ni a, Grand Finale-a inlan turin mi pathum an tling. Final hi November 11 zan khian The Grand Hotel-ah neih a ni dawn a, Zonet Zawlbuk-ah zan dar 8 ṭangin live-a pekchhuah a ni ang. Thawhlehni zan khan top 5 result puan niin, mi pasarih aṭangin mi pahnih an tla. Mi panga ten intihsiak an hmachhawn zui nghal a, an zing aṭang hian top 3 thlan leh nghal a ni. Top 5 intihsiakah hian A. Lalhlimmawia, Thingkah a ding chhuak hmasa ber a, boruak a nung nghal hle. Fiamthu ṭha tak tak a khawnkhawmte chu hnehsawh fahranin a sawi par par a, mipui thawm a ring ṭha hle. A. Lalhlimmawia hi a dang a nal ṭha a, mi bik a nih zia a pho lang leh chiang hle.
Ṭum dang ang bawkin Lalngaihsaka'n boruak a rawn vaw hot leh viau a, a nui hmel chu mite tihlimtu ber pakhat a tling. Fiamthu a sawi zawh apiangin amah uar takin a nui a, mipui chawhphur a thiam hle. Ṭum dang angin fiamthu a khawnkhawm ṭha tawk lo niin a lang thung a, a fiamthuah zuan tawr tawrna tur khawpa nuih tiza a awm lo. Pathumna-ah Lalhmingmawia, Ṭuahzawl a rawn inlan a, a ni pawh ṭum dang a pha lo. Inelna boruak a sang tawh a, contestant-te pawh an zam deuh niin a lang. A hnua rawn ding C. Lalhmangaihzuala, Kanghmun leh Lalrinfela Fanai, Darlawng ten beisei an phak bik lo a, ṭum dang angin nuih hluah hluahna tur a tam lo.
Mi panga ten intihsiak an zawh hnuah top 3-a tlingte hming puan zui a ni. Lalhmingmawia chu Grand finale-a inlan thei tura hming puan hmasak ber a ni a, Lalngaihsaka'n a hnung a rawn zui. Top 5 intihsiaka che ṭha bera ngaih A. Lalhlimmawia chu a sang pathmun zingah a inhlangkai bawk. Anni pathum hi Final-ah an inel leh dawn a, inbuatsaihna nei ṭha an dingchangin a rinawm.
Inrinni zanah hian lawmman sem nghal a ni dawn a, pakhatnain Rs. 1,00,000/-, pahnihnain Rs. 50,000 leh pathumnain Rs. 30,000 a dawng dawn a ni. -Vanglaini
Post a Comment