3rd Hrangbana Memorial Mizoram Badminton League chu nimin khan Electric Veng Hall-ah khelh ṭan a ni a, vawiin hi group B team pali Southern Acers (Siaha), Champhai Ralte Villa BC, Chanmari Evening Stars leh Mission Veng te inlan hun a ni.
Tlai dar 5:00-ah Aizawl khaw pawn club pahnih Siaha club Southern Acers leh Champhai Ralte Villa BC te an inkhel ang a, zan dar 8:00-ah MBL2 finalist Mission Veng leh Chanmari te an inhmachhawn leh bawk ang.
Rinkai zawk Champhai
Champhai lamin MBL-ah tawnhriat an nei tawh a, an player lak danah a lang. MBL-a khingpui la hneh vek India number 1 Daniel S. Farid chu an lalut. Khawvel huapa Indian shuttler langsar Kidambi Srikanth te hian ramchhung inelna an hmachhawn loh avangin BAI ranking-ah an lang ve lo.
Siaha lamin BAI ranking-a 89-na Akshit Mahajan an nei a, Mizo player dang Lalhlimpuia leh M Joseph ten an state pawn player hi an thlawp ṭhat a ṭul ang. Southern Acers lamin Under 19-ah MBA number 2 Lalnunhlua an nei a, hei hian result a thlak danglam thei bawk.
Mission Veng fiahna
Zanina inkhelh dan tur indawt chu men's doubles, mixed doubles, men's singles - 2, Under 19 boys singles leh men's singles - 2 a ni a, he sequence hi Mission Veng tan chuan a lawmawm loh.
MBL2 finalist MSV hian nikum player of the tournament Lalduhawma (Lalmama) an nei a, double specialist hian match zawnin a khelh a ṭul dawn. India number 3 Pratul Joshi tan buaina tur a awm lo a, doubles a inlan a nih pawhin hahdamna tur a awm ang.
Chanmari lamin hmeichhe singles number 1 Lalrinzuali an kawl a, mixed doubles an la thutak ang. Under 19 boys singles khel turin Mizoram junior number 1 Raju Thapa an nei a, state pawn player Aimson Singh an nei bawk a, Chanmari hian Mission Veng barakhaih dan tur an zawng ang
-Vanglaini
Post a Comment