Yamaha Fiamthu Fest chu Inrinni zan khan zawhfel a ni a, Lalngaihsaka, ITI chu pakhatna a ni. 


Grand Finale hi The Grand Hotel, Chanmari-ah neih a ni a, a tawp zan hian mi pathumte'n pakhatna nih inchuhin intihsiak an hmachhawn. Intihsiakna ṭan a nih hmain Host Adama leh Judge Hruaia-te'n Fiamthu Fest sponsor tute live-in an faksak a, tv-ah chauh lo pawh a takah ngei an thiamzia an tilang. Contestant zinga tla tawh Hrangkapchhunga leh Zoremsiama-te'n zaiin mipui an awi a, fiamthu chauh lo, rap thleng pawhin an thiam tih an pholang. 
Intihsiak ṭan a ni a, Lalngaihsaka a rawn ding chhuak hmasa ber. Ngaihsaka hian fiamthu khawvelah a mikhual lo tih chiang takin a lantir leh pek a, entu mipui nui thawm a ring hle. Intihsiak ṭan a nih aṭangin chet chhiat em em nei loin final a lut a, a vawrtawpah pawh a zam duh lo. A inbuatsaihna piah lamah, a tlachawpa thil ngaihtuah chhuah zung zung a awlsam a, a vanneihpui kan ti thei ang. Fiamthu ṭha tak ni lem lo pawh thiam takin a sawi chhuak ṭhin a, chu chu a champion pui ta a ni. 
Ngaihsaka dawtah A Lalhlimmawia a dingchhuak ve leh a, ani pawh ṭum dang ang bawkin a dang a nal leh hle. Hlimmawia hian hnehsawh takin fiamthu a thawh ṭhin a, mipui lawm a hlawh hle. Lalhmingmawia'n hnu a khar a, ani pawh fiamthu thiam tak a ni tih kan hmu leh. A style a danglam a, ṭawngkam bungrua a neih ṭhat bawk avangin final a thleng hi a mak lo. Chutih rualin a thiam bik mi pathum te chauh an inel tawh miau avangin vanduai an awm a ngai. Lalhmingmawia leh A Lalhlimmawia-te vanduaiah an ṭang a, Lalngaihsaka'n dinhmun sang ber a luah ta a ni. 
Final-ah hian Tuarpuii leh Suntea an inlan bawk a, mipui an nui nge an ṭap tih pawh hriat harsa khawpin thawm a ring. Anni pahnih hian mipui lawm an la hlawh reng a, an thiam an la theihnghilh lo. 
Yamaha Fiamthu Fest-a pakhatna Lalngaihsaka hian Rs. 1,00,000/- leh trophy a dawng a, pahnihna A Lalhmingmawia leh pathumna Lalhminmawia ten
Rs 50,000, Rs 30,000 leh trophy an dawng bawk. Yamaha chu main sponsor niin, Social Welfare Department, Disaster Management & Rehabilitation Department, Liando Auto Works, TBL, Gemini Enterprise, Active Sound leh Mizoram Youth Commission-te'n an sponsor bawk.   -Vanglaini

Post a Comment

Powered by Blogger.