Tangrual pawl, Zoram Peoples’ Movement (ZPM) chuan thuchhuah siamin, ZPM chu thla khat leh a chanve chauh la ni mah se, Mizoram mipui ngaihven leh bengkhawn a hlawh hle niin an tarlang a, "Hei hian mipuiin Mizoramah kalphung thar hmanga mipui sorkar, hnam damna tling din an duh tawhzia a tilang chiangah kan ngai," an ti.
ZPM chuan, kum 30 chhung rorelna chelhtute'n Mizoram an hruai dan enin, ram leh mipuite hmasawnna leh hamṭhatna hmuh tur a váng hle nia sawiin, "Vawiin thlenga India ram state 29 zingah Mizoram chu rethei leh pachhe ber zinga mi kan la ni fo mai hi lungchhiatthlak kan ti tak zet," an ti a; Mizoram sawpchhiata awm mek tungding a, siamṭha turin ZPM-in kalphung thar hmanga ram siam an tum thu an sawi.
Inkalpawhna kawngpui chhiat vanga kut hnathawktute'n an thawhrim rah an seng thei lo leh dinhmun chaurau taka an awm chu lainatawm an tih thu sawiin ZPM chuan, "Kalphung tharah chuan ZPM chuan sum siam nan kawngpui kan siam dawn lo a, sumin kawngpui kan siam zawk dawn a ni," an ti.
ZPM chuan, "India rama ziak leh chhiar thiamna lama pahnihna dinhmun hauh ṭhin kha vawiinah chuan palinaah kan tla thla ta dâwrh a, hei hian zirnaa Mizoramin inenkawlna ṭha kan tlakchhamzia a tilang chiang hle," an ti a; zirna lamah tun ang zela Mizoram a kal chuan Mizote zingah civil service officer tur an awm loh a hlauhthawnawm thu leh, ZPM chuan kalphung tharin zirna kalpui an tum thu an sawi.
ZPM chuan, India ram state 29 zingah Mizoram chu HIV/AIDS leh cancer vei tamna ber a ni chu tha nat thlak an tih thu sawiin, "Kan Kristianna nen pawh a inhmeh lo hle. Ram nuam leh thengthaw nei state ni siin, hriselna lama dinhmun chhe ber kan luah hi Mizoramin hriselna kawnga inenkawlna kan tlakchhamzia a tichiang hle," an ti a; hriselna kawnga Mizoram natna leh tlukchhiatna tidam a, tungding turin damdawi dik tak Mizoram mipui an hlui dawn thu an sawi bawk. -Vanglaini
Post a Comment