aizawl fcI League champion Aizawl FC-in Rajiv Gandhi Stadium-a an match hmasa berah minute 87-naa Yugo Kobayashi goal hmangin Churchill Brothers FC 1-0 in an hneh a, hlauthawng taka hun tam zawk hmang Mizo mipui an lawm haw.  December 18, Thawhṭannia Shillong Lajong an mikhual leh ang.
Aizawl FC defender Masih Saighani chu hero of the match-a thlan a ni.
Striker pakhat?
Portuguese coach Paulo Meneses-a'n ngalrek inhliam vangin William Lalnunfela a chhawr thei lo a, hei vang hian Mizoram Premier League-a an formation hman ṭhan 4-5-1 hmangin striker pakhat nen bul an ṭan.  Paulo hian goal nawr nat theih nan striker pahnih chhawr tum mah se William a inhliam avangin Yugo a mal tlattir phah.
Foreigner panga chu rinlawk ang ngeiin starting eleven-ah an tel vek a, goalkeeper pawh MPL-a inlan tam ber Avilash Paul a ni. East Bengal an draw theihna tura corner pettu K. Lalṭhathanga chu a vawi khat nan inkhel bul ṭantir a ni a, Mizo dang David Lalrinmuana, H. Lalmuankima, Lalrinzuala leh Lalram­hmunmawia ten inkhel bul an ṭan bawk. 
Inkhel thununtu
Churchill Brothers-in an match hnuhnung bera Mohun Bagan an hmachhawn ṭumin goal nga an chhuah a, Aizawl FC lakah pawh goal venhim chu ṭan phat aṭanga an thupui ber a ni. Mizo club-in inkhel an thunun a, first half-ah 73% zet ball chang mah se goal an khung thei lo.
Ivorian winger Leonce Dodoz-a'n chance ṭha hmasa ber a hlah a, Dodoz ang thoa MPL-a ziah luh loh Japanese striker Yugo chu  goal hmaah a hriam bik lo. Player pahnih hi  East Bengal an hmachhawn ṭum aiin khel ṭha tawh mah se match fitness a nei lo tih a hriat theih.
MPL best forward-a thlan H. Lalmuankima chu AFC goal nawrna ber a ni a, Bawngkawn tlangval hian hun tawp lamah penalty beseiin a tlu a, referee-in yellow card a pe thung. AFC vanduai ni a thleng turah a ngaih theih a, Yugo-a'n hnai tak aṭangin goal chungah a pet a, substitute Albert Zohmingmawia'n a hlah ve bawk.
Amaherawhchu Mizo club an beidawng duh lo a, minute 87-naah Dodoz leh Yugo ten wall pass hmanga Churchill tlarhnung mawi taka an ṭhiah hnuah Japanese striker hian goal kilah tawih zetin a khung a, chakna goal a ni zui bawk. Inkhel thunun chungin Aizawl FC-in hnehna an chang.
MPL club AFC hian ball possession 72% an nei a, vawi 376 an in pass aṭanga vawi 325 chu dik thlapin an in pe a, mikhual Churchill Brothers erawh vawi 131 chiah ball an in pe dik a, statistics hian team pahnih inthlauh zia a pholang.
Kan lawm e
AFC coach Paulo chuan Vanglaini zawhna chhangin, "Goal khung tumin theihtawp kan chhuah reng a, a tawpah kan vanneih hun a her chhuak ta a ni. MPL-a ṭha taka kan khelh angin kan khel ang tiin ka sawi lawk a, ka sawi ang ngeiin kan khel a ni. Inkhelh hmain Mizo mipui ṭawi­awmna kan ngen a, fan-ten hun tawp thleng min auh phur avangin hnehna kan chang a ni," tiin a sawi.
Vanglaini zawhna chhangin Churchill Brothers coach Alfred Fernandes chuan, "Hnehna chan tumin kan khel a, kan tharum ngah hman ṭangkai kan tum. Mahse, kan 
ṭang tlang zo ta lo a ni. Fans ṭha takin an ṭawiawm ṭhin che u a, Goa-ah pawh AFC chuan fans an nei zel," a ti a, club lian an nih avanga an thawh leh tur thu a sawi bawk. -Vanglaini

Post a Comment

Powered by Blogger.