Lunglei District RMSA hmalaknain nimin khan Lunglei High School tualzáwlah Lunglei khawpui chhunga high school zirlaite intihhlimna leh inkawmhona hun, Winter Fest 2017 buatsaih a ni a, minister PC Lalthanliana'n a hmanpui.
PC Lalthanliana chuan, zirlaite chu ram leh hnam tana mi pawimawh, ram leh khawtlang hruaitu tur an ni tih hre thar leh turin a chah a, "Kan ram leh hnam humhalhna atana ṭha ber chu thiamna hman tlak a ni," a ti a; ram leh khawtlang tana chhawr tlak ni tura ṭan la turin a fuih.
Mizoram chu ruihhlo hmanga rûnin a awm mek tih sawiin PC Lalthanliana chuan, "Kan ṭhalai tam tak nun a tichhe mek a ni. Ruihhlo laka fihlim turin i inhlan thar ang u," a ti.
Lunglei SP J Lalṭhafamkima pawhin thu sawiin, zirlaite'n an nun kawnga hun pawimawh tak an zawh chho mek tih a sawi a, an nun uluk tur leh humsual vawi khat dai a pawizia hre nawn fo turin a chah.
Winter Fest-ah hian Lunglei khawpui chhunga high school 14-a zirlaite an tel a, chawhnu lamah intihhlimna hun an hmang a ni. -Vanglaini
Post a Comment