aizawl water supply scheme mizoramSIPMIU, Aizawl-in Tuikhuahtlang aṭanga Seventhday Tlang leh Luangmuala tuizem liana tui pekna tur pipeline an siam chu nimin khan PHE minister Zodintluanga'n Tuikhuahtlanga PHE Main Reservoir Complex-ah a hawng. PHE Minister chuan, Aizawl khawpuiah ni khatah darkar 24 chhung tui a haw theih nan hna thawh mek a nih thu a sawi.
Pipeline hawnna inkhawm hi PHE secretary Dr C Vanlalramsanga'n a kaihruai a; Zodintluanga chuan, PHE department-in Aizawl mipuite'n hnianghnâr taka tui an dawn theih nan theihtawp an chhuah thu sawiin, "Tun hma chuan tui a haw ṭhat loh hian sawisel ka chíng ve ṭhin a, mahse, department-a ka awm hnu chuan mipuiin tui an dawn theihna atana tlaivar ṭhak 
ṭhakin hna an thawk tih ka hria a, thawktute an fakawm. Aizawl khawpuiah ni khatah darkar 24 chhung tui a haw reng theihna atan hnathawh mek a ni," a ti.
PHE Minister chuan, tui semna tur distribution network km. 363 vel chu Aizawl khawpuiah phûm ṭhat leh phûm belh tura ruahman a nih thu sawiin, "Hna thawh tur 
aṭang hian km. 120 vel phûm tawh a ni a, chhun zan zawmin hna chak taka kalpui a ni. Tui 37 MLD lak belhna tur te, tui dah khawlna tur zém lian veng hrang hrang hmun 27-ah sak mek a ni a, hmun 10-a mi chu zawh niin hman ṭangkai a ni tawh," a ti a; tui chhe lak khawmna sewer line km. 45-a tui siam mekah km. 20 vel zawh a nih tawh thu a sawi.
Aizawla tui semna pipe hlui tawhte chu a chhiat tawh avangin a khát tâwkin a chhe fo tih sawiin Zodintluanga chuan, "Hemi vanga harsatna kan tawh ṭhin hian department chu min tibuai hle. Kan harsatna neihte hi AMRUT aṭangin thlak mek a ni a, pipe hlui, tui pût nasa lutukte leh feeder main châwmtu tur pipe lian pawh eng emaw zat thlak mek a ni. Kan harsatna zualpui hi chu kan sukiang thei turah kan ngai," a ti.
PHE Minister sawi danin, a hmaa darkar 40 dawn Seventhday Tlanga tuizem lian tihkhah nana hun hman ṭhin chu tui pipe thar hman a nih hnuah chuan darkar 8-ah a titawi thei dawn a ni a; pipe hi Aizawl west lama mihring 44,902 chu kum 2048 thleng châwm zo tura ngaih niin, darkar khatah tui litre 5,00,000 pe thei tura ruahman a ni.
Sorkar department hrang hrang thawhhona a ṭhat avangin tui pipe line thar siam zawh theih a nih thu sawiin Zodintluanga chuan, "Thawhhona a ṭhat chuan ramin hma a sawn zel ang. Kawng péngṭhuamte kan zauhnaah pawh department hrang hrang an ṭangrual a, a rah kan hmu. Aizawl hi zauh a har tawh a, a theih ang angin kawngpui pengṭhuamte zauh zel kan tum," a ti.
Inkhawmah hian SIPMIU programme director Valbuanga'n PHE Engineer-in-Chief hnenah PHE Minister-in a hawn tâk tui pipe line thar chu an enkawl turin a hlan a ni.
Tui pipe line thar hi km. 6.41-a thui a ni a, a phûm hna chu December 20, 2016-ah thawh ṭan niin, December 14, 2017-ah zawh a ni. Pipe phûm nan cheng nuai 1010 sên a ni bawk.-Vanglaini

Post a comment

Powered by Blogger.