Prime Minister Pu Narendra Modi-an December ni 16 a Mizoram a rawn tlawh tum khan Chief Minister Pu Lal Thanhawla chuan Mizoram state mamawh pawimawh zual deuh deuh leh hmarchhak bial a tan a pawimawh zual te chipchiar taka tarlanna Memorandum a lo pe a ni.
CHIEF MINISTER IN PRIME MINISTER HNENAH MIZORAM MAMAWH ZIAKIN A THLEN
Chief Minister chuan "Participation for All and Development for All( Sabka Saath, Sabka Vikas)", Mi zawng zawng tana hmasawnna tura thawhho policy chu Mizoram mipuiin a thlawp tih a sawi a; he policy hlawhtlinna a tan hian state sawrkar te chu thuneihna sang zawk pek a rawt a. Chief Minister chuan state in an tualchhung mamawh leh tangkaipui tur an hrechiang zawk tih Prime Minister hnenah hian a sawifiah a ni.
Ramchhung bung hrang hrangte hmasawnna kawnga an inthlau lutuk tur siamthatna policy tam zawkte a lo hlawhtling tawh lo tih a sawi a. A bikin hmarchhak bial tan phei chuan hmasawnna kawnga state dangte umphak turin sawrkar policy tam zawk te chuan awm zia a neih loh thu sawiin hmarchhak bial tih hmasawnna atana din North Eastern Council (NEC) ngaihthah a ni chu tha lo a tih thu tarlangin Central Sawrkar chuan hmarchhak bial tihhmasawn a tum tak tak a nih chuan NEC hman tur sum tam zawk a ruahman a ngai a ni a ti.
Hmasawnna ruhrel din kawngah Mizoram chu state tenau leh mihring tlemna a nih avangin mimal sumdawng lian te an rawn lut tha duh lo tih sawiin central sawrkar puihna ah a innghat lo thei a ni a ti a.Central Sawrkar in private investor te Mizoram leh Hmarchhak bial a an rawn luh theih nan Financial Policy siam in remchanna sumdawngte tan siam se a sawt a rin thu a sawi a; tun dinhmunah Champhai Zotlang a Rs 22 Crore senga din tur Truck Terminal leh Warehouse leh Rs 30 Crore senga siam tur Sairang a FIFA Academy te chu Mizoram tana hmalakna kal mek Central in tipuitling hmanhmawh se tih an beisei zinga mi te an ni a ti.
Internet Connectivity chu hna tinreng thawhna a nih avanga ngaihven hmanhmawh a that thu sawiin Chief Minister chuan Central sawrkar in Digital India programme hnuaia Broadband to All leh Optical Fibre Network to Every Village kalpui a tum chu thil lawmawm tak a ni a ti. Mizoram chhungah heng hmalakna puitlin tur hian Rs 300 Crore chiah a ngaih a vangin Central tan thil tih awlsam tak nia a rin thu sawiin he hnathawhnaah hian State Department te thawhpui ni se a duh thu a tarlang a ni.
Mizoram-ah kawlphetha 4300 MW Lui tui khuah hmangin leh 6090 MW nizung chakna hmangin siam theihna tur hmunhma a nei tih a sawi a. MInistry of New and Renewable Energy(MNRE) tanpuina in Tuirini 24mw Hydel Project chu Rs 465.00 Crore senga siam tum a nih thu leh MNRE hnuaia tanpuina erawh Central sawrkar in State tan kawlphetha siam theih zat 3 MW atanga 25 MW a tih pun hnu pawn Rs 20 Crore chiah a la ni reng tih sawiin sum lam a harsa Mizoram state ang tan chuan hnathawh a harsat thu Chief Minister chuan Prime Minister hi a hrilh a ni.
Mizoram a khawpui 1 leh khawpui tenau 22 te central sawrkar beisei ang a hniang hnar taka nitin tui hnianghnar taka pe turin Rs 250 Crores leh Mizorama thingtlang khua 738 a tui hnianghnar taka pe vek turin Rs.1400 crore mamawh a nih thu Chief Minister chuan a sawi a. National Rural Drinking Water Programme (NRDWP) kangtlangin kum tin Rs 20 Crore chiah hmuh thin a nih thu leh he tanpuina sum hi liantham zawka rawn pek a nih si loh chuan Mizoram chhunga cheng ten tui intur hnianghnar tak dawng turin kum 70 an nghah a ngai dawn a ni tih Prime Minister hnenah hian thlen in chak zawka hmalak sak turin a ngen a ni.
MIzoram kawngpui chu bungua leh inkalpawhna ruhrel lianber a ni tih sawiin Mizoram chhungah Km 100 bialah kawngpui Km 36.19 chiah awmin India ram pum huap tehna Km 100 bial chhunga kawngpui Km 166 a sei nen a inthlauh nasat thu a sawi a. Mizoram chhunga kawngpui Km 7632 a thui enkawlna senso chu Km 1 ah Rs 6.45Lakh zela chhut in kumkhatah Rs 300 Crore zet a ni a; state tenau Mizoram ang tan chuan thil awlai lo tak a nih thu Prime Minister hnenah hian thlen in Km 100 bial chhunga kawngpui Km 166 a sei Mizoram chhungah kawng siam ve a nih theih nan Prime Minister chu hma la turin a ngen bawk a ni.-DIPR
Post a Comment