Ṭawi East Block MNF chuan nimin khan Saitual Auditorium-ah conference leh hnam pasalṭhate chawimawina hun an hmang a; thu sawitu, MNF president Zoramthanga chuan, Congress kaihhruai sorkarin zu an zawrh avangin kohhran an tithinrim niin a sawi.
MNF President chuan, "Congress sorkar chuan zu zuarin kohhran thin an tirim tawh a, sorkar hnathawk, zirlai leh mipuiin an ring tawh lo a ni," a ti a; Congress party chuan tlin leh an inrin tawh loh avangin mahni tan a mawi leh mawi lo pawh dáwn loin ṭhahnemngai takin chakai an khawrh nia sawiin, "An pu ber Pu Hawla pawhin 'Kan tling tawh dawn chuang lo, a theih laiin sa thuai thuai ang' ti ni âwm takin Kolkata-ah in a sa vut vut mai a ni," a ti.
Congress sorkarin zu an zawrh vangin Kohhran thin an tirim - Zoramthanga
Zoramthanga chuan, Congress party chu hnam thinlung púte rahbeh leh sawi nawmnah hna bera neiah puhin, Mizo nationalism ṭhan zel an hlau niin a sawi a, "Martarte thih chhan pawh sawi nêpin, martarte chu sárthi an ti a, Zoram remnate hi a nêp thei ang berin an sawi ṭhin," a ti a; tun hnaia India President lo zinin Mizoram remna chu 'Khawvela remna hlawhtling ber' tia a sawi chu Congress party tan zahna tling niin a sawi.
MNF President chuan mipui hnenah ngaihdam dilin, "MNF sorkar hmasakah khan hnam martar chhungte an phû ang kan tihsak tâwk lo tih kan hria a, thinlung takin ngaihdam ka dil a che u," a ti a, hnam sipaite leh an chhungte chu MNF-a haw khawm leh turin a sáwm.
Nimina Saituala inkhawmah hian Ṭawi East Block huam chhung - Saitual, Keifang leh a chhehvel khaw paruk aṭanga hnam sipaia zalenna suala chhuakte chawimawina hun hman a ni a, mi 243 hnenah chawimawina thuziak hlan a ni. Martarte zahna leh sûn nan minute khat chhung ngawi rengin an ding bawk. -Vanglaini
Post a Comment