Kumin krismas leh kumthar vuakvetah Mizoram Sawrkar chuan halpuah leh halmawi chi hrang hrang hal, lei leh zawrh a khap tlat a. Silai lem mu nei, kah chhuah theih ang chi zawrh leh lei pawh khap tlat a ni. Vawiin khan hemi chungchangah hian Home Minister Pu R.Lalzirliana hovin a pisaah meeting pawimawh tak koh a ni.

Pu R.Lalzirliana chuan halpuah leh a kaihhnawih thil dang khap chungchangah mipui zau zawka inzirtir tul a tih thu leh he khapna dan hi kum dang aia uar leh uluk zawka kalpui a nih tur thu a sawi a. Kum danga tih ngailoh angin School Education leh Higher&Technical Education Department kaltlangin Mizoram chhunga school hrang hrangah naupangte zirtir tum niin Mizoram Kohhran Hruaitute Committee kaltlangin kohhran tinah puangzar tura ngen an nih thu a sawi lang bawk. Home Minister chuan hriselna atana thil tha lo tak a nih avangin halpuah leh halmawi hal chu Supreme Court meuh pawhin a lo khap tawh tih sawiin hlim tlang taka he hunpui hi mitinin kan hman theih nan halpuah leh halmawi lam chi hal lo turin Mizoram mipuite a ngen a ni.

Meeting hmasaa lo rel tawh angin Mizoram District tina Deputy Commissioner-te chuan anmahni huam chhungah halpuah leh a kaihhnawih  leh silai lem mu kapchhuak thei lakluh leh hman khapna thupek an tichhuak a, Mizoram Sawrkar hnuaia check gate zawng zawngah khap thil la lut lo tura ven niin BSF leh Assam Rifles-te pawh ramri atanga khap thil lakluh a nih loh nana venpui tura ngen an ni bawk. Kum dangah inchung zawl atanga halpuah leh halmawi hal ching an awm nia hriat a ni a, hemi chungchangah hian meeting chuan a haltute chauh ni lovin a in neitute pawhin mawh an phur dawn niin an sawi. 

District tina DC leh SP ten Village Council leh tlawmngai pawlte nena tangkawpin veng leh khaw tinah khapna thupek hi an puangzar tan tawh a. AMC kaltlangin Local Council-te pawh thupek hi mipuite hnena puang zar tura hriattir an ni bawk. Social media lama thehdarh turin halpuah hal that lohzia tihlanna video clip tawi leh animation siam tum niin hei hi Information & Communication Technology (ICT),  Information and Public Relations (I&PR) Department te leh Central YMA kutah dah a ni.
Vawiin meeting-ah hian Home Department hotute, District tin DC, SP leh an aiawhte bakah Taxation, AMC, ICT, Fire &Emergency Services atangin official-te leh Central YMA hotute an tel a ni.  -DIPR Mizoram

Post a Comment

Powered by Blogger.