Hontrade Ṭhazual LengzemKimkima chuan Feli Fanai khumin, Hontrade Ṭhazual Lengzem chart-ah pakhatna a hauh a, chart-a dinhmun sang ber a luah ṭum khatna a ni. 
Kimkima hian a hla hit 'Sarah, I zunzam' tih hmangin pakhatna hi a hauh a, a hla thulkhung hi a hlawhtlinpui mek a ni. Chart-a dinhmun sang ber luah tur hian kawng a awlsam lo a, a zawna ṭum li zet pakhatna lo luah tawhtu Feli Fanai khum tur hian hun a duh rei hle a ni. Feli hian 'Pheicheh mawi I khai ang aw' tih hla hmangin October thla laihawl aṭang khan pakhatna a hauh ṭan a, tunah chuan Kimkima hun a her chhuak ve ta a ni. Feli hian chart-ah hian pahnihna a la hauh pha tho a, a music video danglam leh hmuhnawm tak hi a hlawhtlinpui viau a ni. 
Kimkima hla 'Sarah, I zunzam' tih hi youtube-ah a lyrics video dah hmasak a ni a, mi nuai li chuangin an en tawh. A official music video hi Music Domain Mizoram (MDM) chuan November 16 khan an upload leh a, mi nuai khat chuangin an thlir leh tawh. A hla hi sakpui a nuam a, tun laia lengzem hla lar ber pakhat a ni mek. 
Chart-a pathumna chu Josephine Lalawmpuii a ni a, PUC Various Artists chu pali-naah an awm. PUC Varoius Artists hi chart-a an lan ṭum khatna a ni a, 'Zoram Rohlu PUC' tih hla hmangin sang takah an rawn invawrh nghal thei a ni. 'Lunglen a na' tih hla lungkuai taka satu Zorinzuali Khiangte pawh a sang panga zingah a hming a lang leh a, a ni hi chuan chart a chhuahsan meuh lo. 'Lunglen a na' ti chunga dinhmun sang ber pawh lo luah tawhtu hi a mikhual lo hle a ni. 
Henry Lalmalsawma Renthlei pawh a sang 10 zingah a tel zui zel a, mipui rilruah 'Run hmun leng ila' tih lam a la lang a ni mahna. Sangkimi Khiangte chuan 'RM I hmangaihna' tih hla hmangin pasarihna a hauh a, pariatna chu H.T Lalthanzami a ni. John Mawitea leh Mapui Fanai te hla phuah, 'Hmangaih mengmawite' tih rawn sa thar lehtu F. Zomuanpuia leh H.T Lalthanzami te chu pakuanaah an awm a, Sena hlondo chuan hnu a khar thung. 

Hontrade Ṭhazual Lengzem Top 10 

1. Kimkima - Sarah, I zunzam 
2. Feli Fanai - Pheicheh mawi I khai ang aw
3. Josephine Lalawmpuii - Ka tlin tawk
4. PUC Varoius Artists - Zoram Rohlu PUC
5. Zorinzuali Khiangte - Lunglen a na
6. Henry Lalmalsawma Renthlei - Run hmun leng ila
7. Sangkimi Khiangte - RM I hmangaihna 
8. H.T Lalthanzami - Ka hmangaih che a sin
9. F. Zomuanpuia feat H.T Lalthanzami - Hmangaih mengmawite
10. Sena Hlawndo - Chhingmittui

-Vanglaini

Post a Comment

Powered by Blogger.