Lalrinliana Colney
Khatia hun chep tak kara kan khawpui a rawn tlawh ṭum khan, eng tak rawn sawi ang maw tiin kan lo thlir a. Inthlan a hnai tawh si a, BJP a rawn campaign-pui chiam mai awm mange kan tih laiin, Delhi tlang atangin, Mizoram a rawn hmuh chian zia leh hmabak kan neih that zia a rawn auchhuahpui ta daih mai. Mi retheiten lei rem an rahna tur, thu nawi te te chu a sawi ve hauh lo mai.
INDIA PRIME MINISTER NARENDRA MODI-A THUSAWI BIHCHIANNA
A thusawi atanga rualawhna tur min chhawpsak langsar deuh deuhte kha i han bihchiang teh ang:
TOURISM: Lengpui Airport atanga Helicopter-a a lo thlawh chhoh khan, kan tlangram mawinate rawn hmu chhovin, Thuampui Helipad atanga car-a lo tlan pheiin, Aizawl khawpui lang pe un maite kha a rawn thlir phei a, a la hmuh ngai loh, chutiang taka hmun mawi chu India ramah hian a lo awm reng mai tih a hmuhin " _Mizoram hian khualzin mite hip tura mamawh zawng zawng deuhthaw in nei sa vek a...khuazin mite pan ber hmunah siam tumin i thawk tlang ang u_
" a rawn ti nghal ngawt mai asin.
A ni reng taka, keinin kan en liam mai mai hi, phaizawla awm vai ho tan chuan hmuhnawm a tling takzet a ni. Phaia kan awm laiin an hmun nuam tihte kan tlawh nual hman a, chung zinga mipuiin an tlawh tam ber chu, tlang ram, khamrang lam kha a ni daih. Kei ve lah chuan, " Hetiangte chu kan ramah a tam lutuk" tiin ho ka tihsak thu ka sawi chhuak hial. Mahse anni chuan motor insulpel zut zut khawpin, ramngaw thelh hnuai chaw va eikhawmte kha nuam tiin, an phu sup sup mai a ni.
Kan Reiek tlang te, Hmuifang tlang te hi an tan chuan ha hipa sawi tlak a nia sin. Kan hmun nuam neihna apiang mai hi, kalkawng zau hek hawk siam ila, fur ruahtui tih chhiat mai mai loh tura tlovin han concrete hmiah mai ila, he ram mawina hi mi dangten min hriatpui tak tak hunah chuan, khualzinte sum hmanga sum hailut thin, Goa khaw lum ai chuan, kan ram sik leh sa nuam hian mi a hip zawk hun a la awm ngei ang. Kut kan la thlak nep em a ni.
KAWLPHETHA: Kan ram hruaitu thenkhatin, "Kan lui tui khuah ai chuan Thermal power siam a hlawk zawk ang" tia, Gas lipui chunga awm anga min dream-pui laiin, kan Pu Modi chuan, a dream sawi mai lovin, hmuh theih sa, tangkai taka hman theih tur kan nei a ni tih hriain, Mizoram chu India hmarchhak State zinga mahni state khamkhawp aia tam Kawlphetha siam chhuak thei state 3-naah a puang hmiah mai a ni. _"Kawlphetha siam mai bakah lawng hmangin thingtlang khuate inkalpawhnate a rawn siam dawn a, Sangha vulhna lian tham tak a ni thei nghal a, tui in tur thianghlim lakna remchang a siam dawn a, Eco-tourism tan pawh remchanna a siamsak dawn a ni, Mizoram in Kawlphetha a siamchhuah theih zat chu 2100MW a ni nachungin a siamchhuah tawh chu tlem te chauh a ni a, Mizoram hi Power Genrerating State a nih lohna chhan a awm lo_ " min tihsak diah mai. Kan ram CM atan ka va awt em.
SUMDAWNNA HMUNPUI: Kan pu Modiji chuan kan hmabak eng min hmuhsak leh chu, _"Mizoram chu India tan South East Asia sumdawnpuina tur atan kawtchhuah remchang ber a ni a; ram dang 2 - Myanmar leh Bangladesh te insumdawntawnnaahte thleng pawh, Free Transit Point-ah a la remchang leh cheu a; Mizoramin heng zawng zawnga a hlawkpuina tur hi a lian tham takzet a ni_ min tihpui leh bawk. A takin hengte hi a thlen theihna turin, a chhunga cheng ram hruaituten ruahmanna tha tak a duan si loh chuan, a tak ram kan thleng har leh ngawt ang le.
MIZORAM MAU: Kan ram mau hi a tha tawk lo, mau tha kan chin a ngai, tia khaw chhak mau tha chin tuma hma kan lak kual vel chhungin, kan mau neihsa chu, kan kawmthlang vai ho chuan, hausakpui nan an hmang reng mai si a. Tuirial leh Langkaih lui dungte chu, thlasik mau sah hun a rawn nih meuh chuan, vai mau tur hi a tawlh dul dul reng mai a nih hi. Chungte chu kan Pu Modi bawk chuan min uisakin, _"Mizoram chhunga mau te hi, a huan neitute tan permit dil kher ngai tawh lovin in hralh thei a, hmanruaah siamin sumah in chan tir thei tawh ang_ te a la ti deuh deuh. Keini lahin sum siam nan kan la hmang nep em em mai si.
Kan ram hausakna hi Delhi tlang atang khuan a rawn hmu chiang asin, "Heng zawng zawng a taka a thlen theih nan, BJP lo thlang tling ula, nasa takin hma kan rawn lakpui ang che u" a ti lem lo.
Ram ralmuang kan nih zia te min fakin, _State tenau ten State lian zawk te an el ve theih nan Centrally Sponsored Schemes kan intum sem dan pawh 90:10 in Hmarchhak bial tan chuan kan kal chhunzawmpui a, Central Sawrkar chuan Rs 1000 Crore hmangin Hmarchhak bialah Electric thirhrui thlun kual hna a thawk dawn a, he project ah hian Mizoram pawh a tel a ni, ,Special Accelerated Growth Development Project in the North East hnuaiah Rs16,000 Crore sanction a ni leh dawn a, hmarchhak bial tih hmasawn nan kum 3 chhungin Rs30,000/-Crore ruahman a la ni leh ang, Hmarchhak bial state khawpui zawng zawng te chu Indian Railway Map-ah tarlan Sawrkar chuan a tum a, India in Rail Line project thar 15 hnuaia relkawng Km 1385 a sei, Rs 47,000/ Crore senga siam a tumna-ah Mizoram pawh a tel, Aizawl khawpuiah Double Gauge relkawng a la lut dawn a, hei hi India sawrkar in 'Act East Policy' vung taka a kalpuina hmanraw pakhat a ni_ tiin, a ram neitu ai mahin min hmangaih zawk emaw tih turin, kan hmabak eng tak min rawn hrilh nghek mai a nih kha. A ram neitu bawk hian kan lo pawhchhiatsak leh a ngem le?. MIZORAM QUOVADIS.
Post a Comment