Indian National Congress President thar Rahul GandhiRahul Gandhi chu kar kalta Inrinni khan Congress President thar atan hlankai a ni ta a, a nu Sonia Gandhi a thlak a ni. 



Kum 47 mi, Rahul Gandhi hi New Delhi-a 24 Akbar Road-a an party headquarters-a inkhawm buatsaihah Congress Central Election Authority Chairman, Mullappally Ramachandran chuan party president atana thlan tlin a nihna certificate a hlan a ni. He inkhawmah hian Sonia Gandhi bakah Rahul-a farnu Priyanka Gandhi Vadra leh a pasal, PM hlui Manmohan Singh-te bakah party hruaitu pawimawh ṭhahnem tak an tel. 
Rahul Gandhi hian kum 19 chhung party president dinhmun lo chelh tawh, a nu Sonia Gandhi a thlak a, Congress party president 49-na niin, Nehru-Gandhi chhungkaw member aṭanga Congress president ni thei parukna a ni. 
Indian National Congress President thar Rahul GandhiParty president atana lakluh a nih hnuah Rahul Gandhi chuan thu a sawi nghal a, Prime Minister Narendra Modi chu beiin hmanlai  hunah India ram a kirpui leh a ni, a ti. Rahul Gandhi chuan, "Congress chuan India chu kum zabi 21-naah a hruai kai a, mahse PM chuan hnung tawlh puiin mediaval hun, mite an sakhua leh thil ei avanga kut thlak leh thah an nih ṭhin hunlaiah min letpui a ni", a ti. BJP chuan tichhia a, Congress chuan a tuamdam thung tiin Rahul Chuan a sawi a, "Anni chuan inhuatna an thehdarh a, keinin hmangaihna. Anni in an ṭhendarh a, keini chuan mipuite kan huikhawm thung a, chu chu kan danglamna a ni", a ti. 
Rahul Gandhi chuan ngaihdan inang lo leh inpawmpui theih loh nei mah se BJP chu unau angah an ngai tih a sawi. BJP chuan Congress awm lohna India siam an duh a, Congress nuaibo an duh a, mahse Congress nuaibo theih a ni lo tih leh India mipuiten an ngaihhlutna chu BJP zingah pawh a bang bik lo tih sawiin, huatna chu huatna veka chhanlet an tum ve lo tih a sawi. 
Indian National Congress President thar Rahul Gandhi hian kum 2013 January thla aṭang khan party vice-president dinhmun a chelh a, hun eng emaw chen kalta aṭang khan party hruaituten party president-a hlankai an duh a ni. Mahse Rahul Gandhi hian inthlan hmang ngeia president dinhmuna inhlankai hi a duh a, mahse party president thlannaah candidate dang an awm loh avangin chuhtu awm loin a tling a ni. 

Post a comment

Powered by Blogger.