Thalai Huang Chanchinthar : Times of Mizoram
Lungleiah Kimkima concert dawn
Tunlai zaithiam lar Kimkima chuan zanin hian Lungleiah concert a nei dawn a, tun hi ama puala concert a neih vawi khatna tur a ni. 
Concert hi Laldenga Park-a neih tura ruahman a ni a, zan dar 7 aṭangin ṭan a ni ang. Kimkima hian 'Sarah, I zunzam' tih hla a larpui mek a, tunlai lengzem singer zinga mite ngaihven ber pakhat a ni mek. Reality Show aṭanga lar chhuak ni lo zaithiam lar kan neih tlemte zinga mi niin, kum lamah pawh naupang te a la ni. 
Kimkima concert neih tur hi 'Concert for Youth' tih a ni a, LBS Suzuki chuan an sponsor a ni. 

Thalai Huang Chanchinthar : Times of Mizoram


Krismas kawngzawh ropui buatsaih dawn
Post Event Management Inc. chuan December 23 hian Krismas kawngzawh ropui an buatsaih dawn. Kawngzawh hi Chanmari kawn aṭanga ṭan tur a ni ang. 
Christmas Parade-ah hian rimawi chi hrang hrang tihrik a ni dawn a, Zarkawt kawnah zaithiamten mipui an awi ang a, street dance leh cycling pawh hmuh tur a awm bawk ang. Krismas kawngzawh ropuiah hian naupang aṭanga puitling thlengin, a duh a piang tan tel theih a ni. A hmunah hian Mas putar lukhum sen lei tur a awm dawn bawk. 

Thalai Huang Chanchinthar : Times of Mizoram

MDM-in royalty sem chhuak
Music Domain Mizoram (MDM) chuan an library aṭanga music video hmangtuten an hman man an pek aṭangin October thla chhung khan zaithiam mi 11 hnenah royalty a pe chhuak. 
October royalty dawngtute hi - Arini, Jojona ft Maliani, Dr. Zova, Dindini, F. Vanlalruata, Kimkima, Josephine, Sena Hlondo, F. Zomuanpuia ft Ht. Lalthanzami leh Mercy te an ni. MDM hian zaithiamten an music video aṭanga hamṭhatna an hmuh theih nan hma a la reng a, kum 2013 aṭang khan  zaithiamte hnenah thla tin royalty hi a sem chhuak a ni. Royalty hi Cable TV-te'n zaithiamte music video an hawh man aṭanga sem chhuah ṭhin a ni.

Thalai Huang Chanchinthar : Times of Mizoram

Mi harsate tan Hannah Khiangte
Designer Hannah Khiangte chuan nimin khan mi harsate  ṭanpuina turin Civil Hospital-a Pediatrics Deparment-ah Rs. 60,000/- a hlan. 
Hannah Khiangte brand ambassador DJ Lelvenhimi leh midangte chuan ṭanpuina hi an hlan a, Pediatrics Deparment-a naupang enkawl lai naupang pahnih hnenah Rs. 10,000/- ve ve an hlan. Hei bakah hian Bethlehem Venga chhungkaw pahnih hnenah Rs. 10,000/- ve ve an hlan bawk.  Hannah Khiangte chuan, "Kuminah hian malsawmna tam tak kan dawng a, mi dangte ṭanpui let thei tura kan awm hi kan vannei hle a ni" tiin malsawmna an dawn nasat avanga midang tana lungchhuak thei an nih thu a sawi. 

Thalai Huang Chanchinthar : Times of Mizoram

Source: Vanglaini

Post a comment

Powered by Blogger.