Mizoram State MMA Association (MISMA) leh Zonet Cable Pvt. Ltd. buatsaih Mizoram Fight League season hmasa ber kharna chu zanin dar 8:00 hian Pachhunga University College Auditorium-ah neih a ni dawn a, kumin tir lam aṭanga bul ṭan MFL-ah hian fight night vawi sarih neih a ni tawh.
MFL fighter-te hi team liah ṭhen an ni a, fighter-te chak dan a zira point pek - individual point chu team point atana belhkhawm a ni.
Zanin hian champion inchuhin DSZ Fight Club leh PROMISE Strivers te an intum dawn a, pathumna zawng turin Zarkawt BCA Brawlers leh Mission Veng Juggernaut MMA te an intum dawn bawk - MFL interim champion lai pali ten title belt hum an tum dawn a, MFL champion hmasa ber weight paliah (Fly, Bantam, Feather leh Middle) hlan a ni ang.
Mizoram chhunga hneh loh la tawng lo Deng Thanchhunga chuan Taekwondo-a Mizoram champion of the champion leh national MMA medalist lo ni tawh lakah bantamweight title hum a tum dawn a, a hmuhnawm ang.
MMA international fighter PMS Dawngliana leh Muay Thai international fighter, MMA lama lut ta zawk Ngursaimawiate intum tur hi hmuhnawm tak a ni dawn bawk. Palian pahnih inbei tur (Main event) hian mi ngaihven a hlawh hle bawk a, boxing lama mi turu Jack Lalsangliana leh wrestler ṭha tak C. Lalfamkima ten Middleweight title an inchuh dawn a ni.
MFL-ah hian fighter-ten match khatah hnehna an chanin Rs. 10,000 (cheng sing khat) an hlawh ṭhin a, hnehna chang lo zawk pawhin Rs. 5,000 (cheng 5000) an hawn ṭhin - zanin hian Fighter of the season thlan a ni bawk ang.
Post a Comment