 |
| Model: Jenny Lalhriatkimi |
Min hmangaih em emtu chu hnâwlin min duh ve tu leh ka duh em em chu thlangin a lam ka pan ta a. 'Hlim reng ang che!' tia min thlah chungin, "Hei hi a nih hi ka bialpa, nang a chhai phâk ka ni lo!" ka tih chiah chuan a mit ata mittui a hnâm pâr a. Ka bialpa lam chu hawiin, "A mittui tlakna tur thlen lo hram rawh aw?!" tiin a phun sap a. Ka bialpa thar bike ah chuan chuangin kan kal liamsan ta a.
High School kan kal lai ațangin min ngaizawng tawh a. Mahse, ka ngaihsak ngai lova, ka duh ngai hek lo. Min hmangaih tih ka hria a, mahse, a ni ang rethei lutuk ngaihzawn chu ka duh teuh lo. Two Wheeler tal nei lo chu a țangkai dawn lo riau! College kalna tur ka nei nang! Bakah, a ni ang mipa ze dik thlup mai, kohhran bel tlat mai, fir lutuk te zawng ka duh chi hi a ni lo hrim hrim. Kan pâr thei nang!
Chutichuan, College kan kal hnu thlengin min zar sek a, keiin duhzawng ka lo nei ve a. Ka ning țan ta riau mai a. Ni e, min hmangaih tih ka hria,mahse, ka duh lo. Țawngkam na tak taka ka biak pawhin min thlah lova, min kalsan lah a tum hek lo. A țang laklawh nge ni a țang țûng mai a, țan lah chu a khawh fuh phian reuh a.
Mahse, chutia hmusit taka ka bialpa hmaa ka tih ațang chuan a rûka min lo thlîr bâk tih theih a nei tawh lo!
Ka bialpa nen chuan kan hlimin college ah pawh nuam ka ti thei hle a. Pâ hi ka tiin ka duh hliah hliah hi a ni mai. A bula ka awm chuan nuam ka ti a, ka hlim veng veng țhin. Min ngaihsak thiam em em a, ka hlim loh a hlau em em țhin. A thikthu a chhia a, mipa dang ka biak a phal lo bur hi a ni tawp mai.
Ni tin zan tin inhmu siin kan inning lova, kan inkham lova, zanah kan inbiaa, kan inkâwm a. WhatsApp lamah nen kan inbe nasa thei hle. Phone Sex kan hmang zeuh zeuh a, video call in kan inhmuhsak fo bawk. Mahse, a takah erawh kan la ti lo. Ka hmel lang lovin ka saruak thlalak min dil a, ka pe mai a, nalh a tih thu leh duhawm min tih thu a sawi a, a lawm hle!
Ni khat chu a rawn lêng a, ka roomah kan inkawm a. Beer a rawn keng a, kan in dun a. Inngaizawng ta na na na chu kan inthlahlel a, kan infâwp a, kan inkeih mial mial a. Kan duhthawh zel a, ka țang phal thlawt lo. Min tih ang angin ka awm a, a duh dan angin min sawngbawl a ni ber mai. Ka taksain khuhtu reng a nei ta lo. Hmuhnawm ti em emin min en a, "i nalh lutuk!" a ti sap a. Lawmthu hrilh pahin ka fawp zauh a. Min bawh a, a vawi khatna a tan sex chu ka khumah ngei chuan kan hmang ta a. "Tunah chuan ka ta i ni tawh!" a ti a, "Ka hmangaih che!" kan ti ve ve a. A ni pawh a haw ve ta a.
Vawi khatin vawi hnih a hring a, vawi hnihin vawi thum. Chu thil chuan a lehpek dang a hring zel a, nupa ni si lovin nupain an tawn tur ang zawng zawng kan tem ve vek tawh! A kiangah chuan ka thla a muang a, a chângin ka chhungte hriat loh te hian ka roomah a rawn riak a, kan che zankhua lo chauh hi a ni ber mai.
Kan țhianho picnic in kan kal a. Kan hlim tlang hle. Mahse, tlai lam a lo ni a. Zu in miin an in a, a țhenin beer, ka bawiha pawh chuan zu a in nam ve châk a. Kei pawh in tura min tih tlat vangin ka in ve a. Kan ruih deuh hnu chuan kan kal hrang ta țheuh a. Ka bawiha nen room pakhatah kan lut a, khumah kan mu dun a, nu leh pain naupang ena min la en laiin nupa ang maiin kan awm leh ta. A nawmna hi kan pawh ve tawh chiang em a ni. Sim a har a, sim aiin kan duh belh zel zawng a nih hi! Ka lo in hnem deuh nge ni, ka lo muhil a, ka harh chuan ka bawiha chu ka bulah a awm tawh lo. Ka han zawng vela mahse, a awm si lo. Ka bula a phone chu ka khawih a, inbox a lo awm a. Ka han en nak chuan, awi karei, ka țhiannu nena sex chat an lo hman țhinna leh saruak thlalak an inthawn țhinte a lo awm a. Ka thin a rim a, ka nâ a, a tak a nih ka ring lo hial zawk. Mahse, a tak a lo ni ngei si. "Lo kal vat rawh, buk 2naah ka nghâk che." tih hi a awm bawk a. A sawina lam pan chuan ka kal a. Ka thlen dawn țep chuan hmeichhe țe thawm hi ka hria a. Ka hnaih zel a, ka han big nak chuan ka bawiha leh ka țhiannu chuan sex an lo hmang lek chu niin! Phatsan ka ni a, kawp ka ni tih ka hrechhuak chiah a, khang hun zawng zawngah khân ka lo va hre lo thei zawk em! Engmah ti thei lovin ka en ngawt ngawt ringawt a, an zawh chuan an țawng sa sa a, Ka țhiannu chuan, "I hmei nih reng ka duh tawh lo a ni a." a ti a. Ka hriat loh hian kan lo va ințawm rei tawh awm si em! Ka bawiha, min hmangaihtu hnâwla ka thlan chuan, "Ka hmei i ni hleinem, a ni kha a lawm ni zawk!" a ti a. "Kan hmang țangkai ve mai mai a nih hi" a ti leh a. Ka neih min lo ei mai mai a ni tih ka hriat phei chuan nâ ka tiin mawl ka inti a, mak ka ti lo thei lo. Ka kehchhe vek a ni mai.
Chumi ni ațang chuan ka kalsan ve ta a. Mahse, keimah hian ka kalsan nge ka kalsan theihna'n min nawr zawk pawh ka hre lo. Duhleng ka thlang a, ka thlang sual a ni. Phatsan ka ni a, kalsan ka ni tih ka hria a, nâ ka tiin hrehawm ka ti. Chutah, ka hrehawmna belhchhah turin thlalak ka thawnte a lo darh leh zel nen. Hmangaih taka ka lo en, ka nun pum hlan huama ka lo thlan chuan min phatsan mai duh tawk lovin a chhe berin min chhuah ta si!
Ka nun beidawng chuan puitu a zawng a, a hmu lo. Hnêmtu a zawng a, a tawng si lo! Khawvel ka hmachhawn ngam lova, heti renga khawvel hmachhawn ai chuan tiin ka nun tih tâwp a tum a. Mahse, chutih lai chuan, Call ka dawng a, ka chhang a, "Eng pawh i chungah thleng se, ka tan chuan i la ngâi reng. Ka la hmangaih reng che." Chu thil chu hmâna ka hnawl hnu, hmusit leh diriam taka ka kalsan ngei kha a ni. "A tlai tawh!" tih chauhin ka chhâng a. Mahse, a ni zawngin tlaiah a ngai ve lo. Chu zan chuan inhmuh a rawt a, ngen taktea min ngen vangin ka kal a. Kan inhmu ta a. Chu zan chu ka nun inthlakna leh ka nunin kawng êng a zawh țanna zan a lo ni reng si!
Min ngaizawnga min hmangaih thu aiin Pathian hmangaihna a sawi tam zawk a, ka hriat lohin amah vangin ka nun a lo inthlak ta reng mai! "Eng pawh thleng se i tan ka awm zel ang." tia min tiamtu chuan a thutiam tihlawhtlingin, a hmangaihna chuan ka nunhlui zawng zawng a hmuh kân a, hmangaihna ngeia min dawmin, tunah chuan nupa niin fanau neiin a awmah ngaihngam takin ka bei ta reng a! Ka hmangaih a, a natna thlen leh ka tum tawh lo.
Post a Comment