P.C Malsawmzuala[19.12.2017]

KRISMAS NANGNEN



Ka pianchampha lo thleng tur vang chuan ka hlim hle mai. Kum 21 niin sawrkar danah leh kohhran danah pawh puitlinga chhiar theih ka ni ve tawh tur chuan inrintawkna min pek belh ngei ang le.
Chu a chhapah ngaihzawng hmelṭha leh fel tak mai, kan kawmthlangpa ṭawngkam takin 'lu zo veh vawh' ka nei bawk a. Ka bialnu nen, ka ṭhian te nena chu 'Birthday Party' kan hmang tur chu kum tir aṭanga ka ruahman lawk a ni bawka a man hla fe ang.
Chhungkaw lamah uanthu ni lo se mi awmthei ve tak mai kan ni a, sakhuana larunthlak chhungkuaa sawi ni lo mahila 'an sakhawmi lo hle' han tih thlawt tur chi chu kan ni bik chuang lo.
Inlama chet buai vel an peih loh vangin ka chhungte chuan 'Hotel-ah eichhuak mai rawh u, ṭhianho innih dawn phei chuan a nuam pawh inti zawk ang' tiin inhawng takin nuam kan tih zawkna tur hmun min kawhhmuh a, ka nu phei chuan ka pa hriat lovin ka birthday lawmna tur cheng 10000 ngawt min pe nghe nghe.
Zing ka thawh hlim aṭang chuan chu hun kan hman tur ngaihtuah chuan ka helh hawlh a, ka za deuh ruai nimai hian ka hria. Kha mi tukah khan ka bialnu ngawt pawh kha ka be ngun fe ta ve ang.
Tukṭhuan kan han eikham a, kal nghal mai ka duh tawh! Kan hotel booked lah chu tlai dar 4:00 - 6:00pm a ni daih bawk si. Kan lo ti hla mah mahin ka hria!
Hotel-a kan inhnangfak hnuah Beraw tlanga Tourist Logde-ah Party kan nei zui dawn. Engkim tihfel vek a ni tawh a, keini a lawm tur te chauh chu a kim rih lo chu kan ni mai tawh awm e.
Dar 11:00 velah chuan kan doorbell ri ral ral chu chhawnin kawngkhar chu ka han hawng thuai a, ka rin ang ngeiin ka bialnu duhtak, ka duh leh hmangaih em em mai Emily ngei a ni e.
Ka chhungte an chhuah vek tawh vang chuan kawngka khar leh pawm ka rual nghal a, midang an awm a ring deuh nge ni a tim deuhin ka hria.
"An chhuak vek tawh.." ka tih tâk sapah chuan kei ai aia duham zawk chuan min fawp let tawn tawn a, a perfume rimtui zet mai chuan mi a hip kher mai.
Boot, a malte thleng deuhthaw a sang, rawng uk lam deuh bunin jean kekawr tight zet mai a hak chu a tuam chho leh a, pullover dum a hak khuhna atan chuan a pheikhawk rawng nena rawngthlakna lama chiahdun niawm taka inmil kawrfual a khup thleng lo deuh tur hi a ha bawk a, a sam chu ṭawn lovin nikum thlasik dawn a ka duh ang tak mai lukhum lum lam deuh, dum puk ang reng tak mai chu a khum bawk a, a engkim mai chu a fuh vel vek a ni mai!
Kan inpawm a, kan infawp a, kan inthlah hleithei lo a chha chu a ni e.
Chutia chhul lak loh leh tilreh loh innawk reng ta chu thlarau rah zinga pengkhat 'insumtheihna' an tih ang chi khan daih mawlh hek lo, ka pindan lamah a ṭhiangten thawk te kan va lakdun tak hak hak kha.
Muangmara ka intihfai ve hnuah chuan a sambu hnawk niaih mai te chu a lo huih mar ve ta bawk a, bazar lam pan chuan kan inphur chhuak ta lawp lawp a.
Kei tak pheichuan eng tehchiam mah ka lei ve hran lo, Emily chuan eng eng emaw min leisak nualin ka hria. Ka lawmna ber zawk erawh chu amah ka nei chu a ni.
Kan vak kual nasa phian a, keipawhin thil te te ka leisak ve alawm.
Kan thil lei te kan dahfel meuh chuan dar 3 a lo ri der tawh a, ṭhian te ho bekuala kan han insawm kual leh meuh chuan a lo tlai leh duai tawh. Hotel lam pan chuan keini pahnih pawh chu kan inphur chhuak leh ta a, kan thlen chuan ṭhiante hmel lang ala awm lo.
A kawp te te chuan an lo thleng zeuh zeuh a, kan indawt chho zut a ni ber mai. Kan kim meuh chuan dar 5 a ri der tawh a, zanriah kil hmaa lem deuh sek duh hram te chu a kal tlai tlai an la ni zui leh ta nghal râwl nen!
Dar 6:00 chu kan pel thei hram!
December ni 18 chu khua a lum hran tawh lo, Two wheeler-a Beraw tlang lama tlanphei vuk vuk pawh chu a chakawm chiah lo a, mahse, kan hun hman turin a zir em vangin huphurh hmel pu pawh kan awm chuang lo.
Lamkawi tur neuh neuh nei an intih vang chuan Emily nen chuan a hmunhma lo va enfel turin ṭhiante hmaah chuan kan chhuak phei a, kan inthuam lum ve viau nachungin han tlan thawt chuan kan lum zo meuh lo chu a ni e.
Engkim mai chu kan duhdan kan sawi ang chuan a lo felfai thlap a, tihbelh emaw, dahbo emaw tur pawh a awmin ka hre lo.
Emily chuan kan thlen phat aṭang chuan Beer a dawm deuh chawt a, kei a chaweipuar pheng chuan engmah ka ti peih lo.
Midang pawh chu an lo thleng har hran lo. Kan boruak ni deuh hulh hulh vang nge, zu tlemte ka in vang chu ni ka lu a nuam thei reng reng lo mai a, nachhawkna han ban mai tur a awm bawk si lo. Ṭhian te bula na nei anga awm lah chu an boruak ka tichhia ang tih ka hlau ve deuh bawk si. Hrehawm ti ru ṭeuh chung chuan Veranda thlanglamah thlifim dawngin ka ṭhu reng a, Emily pawh ka kiangah.
Mahse, ka awmdanin a zir lo vang nge ni a bet vak lo niin ka hria, nidang angin beer emaw zu emaw pawh chu ka khawihpui ve hauh si lova. Kan boruak chhaih a in ang lo deuh pawh a ni mai thei e.
A tho a, ṭhiante bulah a han kal a, a lo let leh a, rei lo teah a han kal leh ṭhin a, rim tharlam a lo nam leh ṭhin bawk a.
Ṭhianteho chu anmahni tal tal chuan an tal hlawm a, a ṭhen an lam a, a ṭhen kilkhatah an lo inkeih ngawng ngawng bawk a. Bualin lama uak tuarh tuarh thawm te, awki ring lek lek a lo inhnial deuh te, pindan lampana inkuah lut mek te - chu pindan zau lem lo takah chuan hmuh theihin a awm vek asin!
Ṭhian ṭhenkhat chuan, "Helamah i awm bo daih a," lo ti te pawh an awm ve tho a, "Ka rui sual deuh a," ka tih chuan 'e' tiin ṭha takin min kalsan ve leh hlawm mai. Min ngaihven zui hran lo.
Ka bialnu ber pawh chu a han rui ta viau nge ni a rial rei ta khawp mai.
Ngawirengin ka haw daih mai dawn emawni le tiin ka inngaihtuah rum rum a, tuma ngaihsak hlawh lova na tawrh chu a dan a dang kher mai! Kan inah ni se ka chhungte duat rawn fapa mal ka ni ve asin mawle.
Ka birthday lawma lo kal, keimah vanga an duhdan anga hlim leh lawma awm thei, tlai leh puara ka hrai ho chuan min ngaihsak chu sawi loh an hlimna ngawt lo chu engmah an ngaihtuah bawk si lo. Ka luna lah chu dam a hnekin a zual tial tial emawni lehnghal ni. A na tur ut ut mai hian ka hria.
Pawnlamah chuan ka va chhuak a, chowkidar te inlamah nachhawkna eng emaw tal an kawl takin tih thuah ka kal a, vanneih thlak takin an lo kawl mial a, ka eihnuah pawh chuan chhuak mai duh lovin ka ṭhu ve ta reng a, an korean film en chu ka enpui ve reng a.
Min chhawk ṭan ta tihah chuan ka chhuak ve ta chauh a, mahni birthday bera hetia han awm chu a nuam fahran lo hle mai.
An music play ring, beng chheng deuha ri dup dup mai chu ka luhchilh chak lo kher mai. A tu amah chuan min bengkhawn lem bawk si lo. Anmahni hlim hlim chuan an duhzawng tiin an hlim a, Ka bialnu ber pawh chu a chatthla ta nge mawni le!
An reh deuh hnuah lut ve mai ang tiin kawmchhak lama tlang bawk lian vak lovah chuan ka chho ta daih a, thlifim te han dawng ila a harh te pawh ka harh phah mahna le.
Park angreng deuh hian an lo cheibawl a, ṭhutna te pawh a lo awm thlap mai.
Cigarattes fawh vang vang pah chuan chu piancham lawmna nawm hmel tak, a chhunglam kawrawng ru tak si chu ka ngaihtuah zui ta veng veng a.. rilruna ang reng tak chuan ka insehruh ṭeuh a.
Kei, kei ve tehlul pawhin ka piancham lawmtura ka sawm khawm mi 20 em pawh tling lo ten min ngaihthah ni a ka inhriat vangin ka rilru ana a, ka insehruh phah hial a ni a, khawvel chhandam tura kan sual vanga lo kal Isua Krista, a thisena min leitu piancham kan hman dan hian A rilru ava tina dawn tehlul em tih chu; chu thlasik khawvawt vin tuk maiah chuan ka rilruah a lo lang ta tlat mai le!
Krismas, Isua piancham ti a hmang tura kan inbuatsaihna leh kan hmannaah a piancham neitu ngaihtuah si lo hian kan lo va hmang nasa teh lul em!
Zu in miin zu intur neih loh hlauvin an hmanhlel a, a ṭhen ngaihzawng buaiin an buai a, ruihhlo chidang ti te pawh krismas vuakveta tlakchham bik hlauvin kan inngaihtuah a, a rui ve lo te lahin mahni silhfen leh kan in leh lo cheina tur te kan buaipui a, a piancham neitu mawina aichuan kan in leh lo cheidan a ni em kan ngaihtuah tak le!?
Zanlai inkhawma biakbuka kal khawm tur kan awm mang loh laiin halmawi an han hal meuh chuan a pui a nawiin thlertinah kan ṭe leh teng tung bawk si. Biak ina tlarhnunglama shawl bat hlana ṭhu aiin khawilai pindanah emaw malpui lo inkhan chual, Pastor hmaa thutiam la bawk si lo kan tam zawk ang tih hi i ring ngam ve em?
Lengkhawm zai ri aiin kawtthlera ruibuai authawm a ring zawk ang tihtur khawpa a piancham neitu kan ngaihsak lohna hian kan nun erawh a eichhe mek chu a nih si hi.
Kei ve te mah rilrunaa ka awm a nih ngai chuan Thisena min tlantu chu lungngaiin a kun lovang em ni?
Chu mi zan, ka birthday lawm zana ka thiltawn chuan ka nun a thlak danglam chiang kher mai. Kan hmalawka Krismas lo thleng tur chu 'Birthday Boy Isua Krista' bulah hmang turin ka rilru ka siam fel ta nghal a, ka piancham ka lawm tawhah chuan thil chhe ber leh ṭha ber ka tawn ṭum a ni. Ka hre reng tawh ang.

BIRTHDAY LAWM CHU A PIANCHAM NEITU BULAH LE..

Post a comment

Powered by Blogger.